Башҡорт теле һәм әҙәбиәтенән онлайн-олимпиада 5-7 октябрҙә үтәсәк
Башҡорт теле һәм әҙәбиәтенән онлайн-олимпиада 5-7 октябрҙә үтәсәк 5–7 октябрҙә башҡорт теле һәм әҙәбиәте буйынса онлайн-олимпиада үтәсәк. Ҡатнашыусылар үҙ белемдәрен тикшерә, башҡорт теле һәм әҙәбиәтенең үҙенсәлектәре менән яҡынданыраҡ таныша һәм һөҙөмтәләр күрһәтелгән сертификат ала. Проект Башҡортостан Республикаһы Башлығы гранттары фонды ярҙамында тормошҡа ашырыла. Ойоштороусылар — Башҡорт телен һаҡлау һәм үҫтереү ойошмаһы һәм «Мираҫ» йәштәр башланғыстарын яҡлау фонды. Олимпиада башҡорт телен төрлө кимәлдә белгән ҡатнашыусылар өсөн тәғәйенләнгән. Һорауҙар онлайн-тест форматында әҙерләнгән һәм өс йүнәлешкә бүленгән: 1. Башланғыс кимәл – башҡорт телен башланғыс кимәлдә белеүселәр өсөн; 2. Иркен аралашыусылар кимәле – башҡорт телендә иркен аралашыусылар өсөн; 3. Башҡорт теленең диалекттары – башҡорт теленең диалекттары менән ҡыҙыҡһынған ҡатнашыусылар өсөн. Тест үтеү өсөн 45 минут бирелә. Иң юғары һөҙөмтә — 100 балл. Олимпиаданы тамамлағандан һуң ҡатнашыусыға өс көн эсендә йыйған балдары күрһәтелгән сертификат бирелә. Быйылғы олимпиада сиктәрендә ҡатнашыусыларға методик ярҙам: тел ғилеме, грамматика, лексика, фразеология, этимология, эпик һәм әҙәби мираҫ буйынса һорауҙарҙы, шулай уҡ олимпиада биремдәрен үтәү буйынса ғәмәли кәңәштәрҙе берләштергән махсус методик комплекс әҙерләнгән. Ҡатнашыу өсөн олимпиада сайтында https://basholimpiada.ru/ теркәлергә кәрәк. Теркәлгәндән һуң ҡатнашыусыға һайланған кимәл буйынса һорауҙар асыла. Олимпиада башҡорт теле һәм әҙәбиәтен өйрәнеү, белем тикшереү һәм үҙ аллы үҫешеү өсөн заманса һанлы майҙан булдыра. Ул ҡатнашыусыларға ҡайҙа йәшәүенә ҡарамаҫтан, башҡорт теле һәм әҙәбиәте менән онлайн форматта шөғөлләнеү мөмкинлеге бирә. #Стәрлетамаҡрайоны #ОбразованиеСтерлитамакскийрайон #Олимпиада #БашҡортТеле