Вечерний город Владимир. Дмитровский и Успенский соборы, памятник Андрею Боголюбскому.
Вечерний город Владимир. Дмитровский и Успенский соборы, памятник Андрею Боголюбскому. "Того же лета (6666/1158) князь Великий Ростовскый и Суздалский Андрей Боголюбивый, сын великого князя Юрьа Долгорукаго, внук Владимера Маномаха, град Владимер заложи велик зело, попремногу болши перваго, и в нем церковь заложи камену Успение пречиста Богородицы соборную о едином версе, месяца апреля в 8 день, на память святаго апостола Родиона, в день во вторник. ... Того же лета (6667/1159) создан бысть град Владимерь велик зело князем Андреем Боголюбским Ростовским и Суздалским, Юрьевым сыном Долгорукаго, и хотяше града сего стол быти великого княжениа. Ростовцем же и суздалцем не хотяще сего, и глаголюще: «Яко Ростов есть старой и волшей град, и Суждаль; град же Владимерь пригород нашь есть». Великому же князю Ростовскому и Суздалскому Андрею Боголюбскому не точию град сей в великое княжение хотящу, но и митрополью в нем хотяше сотворити, и по древним законом и уставом всем удоволити и учествовати о Христе. В лето 6668 (1160). Совершена бысть святая церьковь соборная пречистый Богородицы Успение о едином версе в новом граде Владимери, егоже созда князь велики Андрей Боголюбский Ростовский и Суждалский, и верх ея позлати; по добродетели же его и по вере к пречистей Богородице приведе ему Господь Бог изо всех земель мастеры всякиа, и украси ю дивно паче иных церквей многими чюдными иконами, и церковными сосуды златыми и сребряными с камением драгым и жемчюгом, и многими книгами, и паволоки и запоны, и вещьми всякими священными чюдне устрои, в ней же и чюдную икону пречистыя Богородицы постави, юже глаголют Луки евангелиста писма, еяже ко отцу его в Киев принесоша в корабли с Пирогощею изо Царяграда, юже взем из Киева, принесе от отца своего, и возложи на нее злата боле тридесяти гривенок, кроме сребра, и камениа драгаго и жемчюга. И даде Господу Богу, и Пречистей Богородице и святей церкви Ея Успению соборней, еяже предивно украси, много стяжаниа, и имениа, и власти, и слободы купленый и з данми, и села лучшая и з данми, и в торгех десятый недели, и в житех, и в стадех и во всем десятое, хотя бо зде не точию великого княжения, но и священный и Божественыа митрополии, и оправдания, а пошлины святителския по греческим святым уставом и по блаженнаго и святаго уставлению великаго князя Владимера утвердити, да будут уставленая и утверженая Господем Богом, и святыми апостолы его, и святыми отцы, и благочестивыми православными цари, и святым и влаженным Великим князем Владимером освященная и возложенная Господу Богу и пречистей его матере Богородице во век века непоколеблема и непретворима". Текст по Лицевому летописному своду