Бӱгӱн, Алтай тилдиҥ кӱнинде, 11В класстыҥ ӱренчиктери ле алтай тилдиҥ ле литератураныҥ ...
Бӱгӱн, Алтай тилдиҥ кӱнинде, 11В класстыҥ ӱренчиктери ле алтай тилдиҥ ле литератураныҥ ӱредӱчилериниҥ II-чи съездинде гимназиядаҥ туружатан ӱредӱчилер атту-чуулу бичиичи Борис Укачинович Укачинге тургускан мемориальный доского чечек салдылар. Бу керек — улу јерлежисти, алтай поэтти, прозаикти, публицистти ле кӧчӱреечини тоогоныстыҥ ла бийик баалаганыстыҥ темдеги. Кепке чыккан 40-нӧҥ ажыра бичиктери телекейдиҥ кӧп тилдерине кӧчӱрилип, бисле кожо арткан. Борис Укачиновичти алтай литератураныҥ классиги деп адаган, бу атты ол бастыра бойыныҥ јайалтазыла керелеген. Митингте поэттиҥ уулы, Амыр Борисович Укачин, Россия Федерацияныҥ нерелӱ јурукчызы турушты. Ол адазыныҥ эземин каруулу чеберлеп, оныҥ керегин кеендикте улалтып јат. «Борис Укачиновичтиҥ jӱрӱми бистиҥ школдыҥ тӱӱкизиле колбулу. Ол бойы, оныҥ ӱч уулы областной национальный школдо ӱренген», деп бойыныҥ сӧзинде гимназияныҥ башкараачызы Наталья Олеговна Тадышева айтты. Мен кырларда ӧскӧн мӧштиҥ бӱри. Јазырап тӱшкен ак јалкындар Мениҥ ӱстиме ойногон, оодылган. Ӧскӧн чыккан кӱнимнеҥ бери Мен тайгадаҥ тудунгам, јаскы салкындар Мени сыймаган, кышкы јоткондор мени сабаган. Бу јолдыктар — поэттиҥ бойыныҥ портреди болгодый. Оныҥ јӱрӱми јеҥил болбогон, је ол ончо уур-кӱчтерди ӧдӱп, бойыныҥ эл-jоныныҥ чындык ла ӧткӱн ӱни болгон. Оныҥ поэзиязында — алтай улустыҥ кылык-јаҥы, чӱм-јаҥдары, тӧрӧл јерге сӱӱжи ле ич-кӧгӱс байлыгы. 10 класстыҥ ӱренчиктери Бадакин Шоҥкор ле Сарбашев Сургалга Б.У. Укачиниҥ «Мениҥ Алтайым» деп ӱлгерин кычырган. Бойыныҥ тереҥ шӱӱлтелериле балдарла Амыр Борисович Укачин ӱлешти. Эзем бисти ӧбокӧлӧрисле бириктирип, калыгыстыҥ энчизин чеберлеп јат. Эмдиги ӧйдӧ бистиҥ тергеебисте Борис Укачинович Укачинниҥ адыла оромдор адалган, кӧрӱлер, кычырыштар, спектакльдар ӧткӱрилет. Борис Укачинниҥ чӱмделгези – качан да ундылбай, јажын чактарга мӧштиҥ будагы чылап, мӧнкӱлик артсын, улу поэт керегинде эзем бистиҥ јӱрегисте ле бистиҥ керектеристе јӱрзин! #ДеньАлтайскогоЯзыка #РеспубликаАлтай #нацпроектмолодежьидети #РО_РВИО_Алтай #РГ_Плакаса #ГодДошкольногоОбразования