Чуораан алгыстаах айаҥҥа атаарар 🔔👨🏻🎓👩🏻🎓 — 29 мая 2026 г. в 08:23:51.304
Чуораан алгыстаах айаҥҥа атаарар 🔔👨🏻🎓👩🏻🎓 Дьоллоох олох киэҥ суола Иннин диэки тыргыллар, Ситиһиилээх олоххо Эһигини ыҥырар. Тиирэ тэптин баарыскыт Билии-үөрэх тыалынан, Сырдыгынан сыдьаайдын Кэскиллээх сарсыҥҥыгыт. 2015 сыллаахха, Үөрэх Билии күнүгэр олус долгуйбут кып- кыра кыргыттар уонна уолаттар ийэлэрин, аҕаларын кытта сиэттиһэн оскуола боруогун аан маҥнай атыллаабыттара. Ол оҕолорбут номнуо 11 сыл үөрэнэн бүтэрэн оскуолаларын боруогун атыллаары, киэҥ билии сомсон олох киэҥ аартыгын атыллаатылар. Үгэс быһыытынан 1-кы кылаас үөрэнээччилэрэ бэйэлэрэ оҥорбут ✈️“Самолетик Будущего” аахсыйаҕа кыттыһан, бэйэлэрин илиилэринэн баҕа санаалаах открытка, гиипсэттэн чыычаах оҥоһук бэлэхтэрин ууннулар. 2,3 кылаас үөрэнээччилэрэ бэйэлэрэ оҥорбут эҕэрдэ открыткаларын 4,9 кылааһы бүтэрэр үөрэнээччилэргэ туттардылар. 4 кылаас үөрэнээччилэрэ алын сүһүөҕү бүтэрбиттэрин туһунан диплом ыллылар. Быйылгы үөрэх дьылыгар уопсайа 7 выпускник олох киэҥ суолугар үктэннэ, кылаас салайааччыта английскай тылын учуутала Дарья Вячеславовна Посельская. Ыҥырыыбытын ылынан, үөрүүбүтүн үллэстэ Чурапчы улууһун үөрэҕириитин управлениятын мониторинг уонна үөрэх хаачыстыбатын хонтуруоллуур отдел кылаабынай специалиһа Посельская Прасковья Николаевна, "Чурапчы улууһа" муниципальнай оройуон опека уонна попечительство салаатын начальнига Антипина Марианна Прокопьевна уонна тыа сирин түөлбэтин Одьулуун нэһилиэгин баһылыга Ефремова Людмила Васильевна выпускниктары эҕэрдэлээн махтал сурук туттардылар. Ситиһиилээх оҕолорго сылын аайы биирдиилээн анал РСФСР уонна Саха АССР үтүөлээх учуутала, РСФСР норуотун үөрэҕириитин туйгуна, физика учуутала, Аҕа дойду Улуу сэриитин ветерана Старостин Петр Афанасьевич, уһун кэмҥэ Одьулуун орто оскуолатыгар директорынан үлэлээбит Саха Өрөспүүбүлүкэтин үөрэҕириитин туйгуна, Российскай Федерация үөрэҕириитин бочуоттаах үлэһитэ Максимов Афанасий Петрович, Саха норуодунай суруйааччыта, Россия уонна Саха сирин Суруйааччыларын сойууһун чилиэнэ, публицист, Саха өрөспүүбүлүкэтин култууратын үтүөлээх үлэһитэ, СӨ оҥорон таһаарыыэйгэтигэр Государственнай бириэмийэ лауреата, Чурапчы улууһун уонна Одьулуун нэһилиэгин бочуоттаах олохтооҕо, биир дойдулаахпыт, уус-уран тылы саҕааччы Василий Назарович Егоров-Тумарча аатынан стипендиялары туттардылар. Нэһилиэк тэрилтэлэрин профкома оҕолору эҕэрдэлээн сэмэй бэлэхтэрин туттардылар. Үөрэнэр оскуолам үтүөҕүн өрүүтүн өйдүөҕүм, оҕо сааһым биһигин, мэлдьитин саныаҕым диэн харда тыл этэн туран оҕолор вальс үҥкүүнү толордулар. Күндү выпускниктар! Аан маңнайгы чуорааңңыт эһигини билии дойдутугар ыңырбыта, оттон бүгүңңү чуорааңңыт олох киэң аартыгар ыңырар. Тиһэх чуораан лыңкынаата, үөрүү-көтүү аргыстаах, оскуола сыллара аастылар, эһигини иннигитигэр күүтэр олох тыргыллар киэҥ аартыга, саҥа дабайыылар. Араас үөрэх кыһатын үчүгэйдик түмүктээҥ, үлэһит үтүөтэ дэтэн, үлэ үөрүүтүн билээриҥ. Кэскиллээҕи кэрэхсээҥ, ыллыктааҕы ырыҥалааҥ, ылсыбыккытын ыһыктымаҥ, санаабыккытын саргылааҥ диэн алгыс тылбытын аныыбыт! 🙌🏻