Сылгы эйгэтигэр хардыы: Одьулууннааҕы конюшняҕа экскурсия
Сылгы эйгэтигэр хардыы: Одьулууннааҕы конюшняҕа экскурсия Ыам ыйын 21 күнүгэр 4-с, 5-с, 6-с кылаас үөрэнээччилэрэ Одьулууннааҕы ат конюшнятыгар экскурсияҕа сылдьан, элбэҕи билэн-көрөн кэллилэр. Көрсүһүү бастакы чааһа Давид Куличкин инструктаһыттан саҕаланна. Кини оҕолорго сылгылар аттыларыгар бэрээдэктээхтик сылдьарга уонна сэрэхтээх буолуу быраабылаларын тутуһарга үөрэттэ. Бу кэннэ Александра Куличкина хас биирдии сылгыны ааттаан-суоллаан туран, кинилэр кыстык кэмин хайдах туораабыттарын, майгыларын-сигилилэрин уонна саастарын туһунан олус истиҥник сэһэргээтэ. Оҕолор ордук Мейн Кониг диэн аатырбыт сүүрүк сылгыттан төрөөбүт кырачаан кулунчугу көрөн, үөрүүлэрэ үксээтэ. Салгыы Николай Константинов, Алексей уонна Коля Кардашевскайдар, Алгыс Халгаев улууска уонна өрөспүүбүлүкэҕэ улахан дьоҥҥо, оҕолорго сыллата ыытыллар сылгыһыттар күрэхтэрин туһунан сиһилии кэпсээтилэр. Николай Сеганович бу күрэхтэргэ ситимнээх дьарык улахан суолталааҕын бэлиэтээтэ. Кини Верхоянскайга, Аммаҕа уонна Мэҥэ-Хаҥаласка ыытыллыбыт күрэхтэргэ хайдах кыттыбыттарын кылгастык сырдатта. Быйыл оскуоланы бүтэрээри сылдьар Алгыс Халгаев сылгыһыт күрэҕэр кыттыы киһи быһыытынан сайдарга улахан кыах биэрэрин, уол оҕоҕо бары өттүнэн туһалааҕын тоһоҕолоон кэпсээтэ уонна күрэх хас биирдии түһүмэҕин билиһиннэрдэ. Алексей Николаевич Болугур нэһилиэгэ оскуола оҕолоругар сыллата тэрийэр күрэҕин хаамыытын туһунан сиһилии кэпсээтэ. Кини атын нэһилиэктэртэн кыттыы өссө да көҕө суоҕун бэлиэтээн туран, көлүөнэ көлүөнэни солбуйан, сылгыга чугас оҕолор өссө элбээн иһэллэригэр баҕатын биллэрдэ. Түмүккэ ыалдьыттар Бөтүгүттэ алааһыгар ыам ыйын 30 күнүгэр ат сүүрдүүтэ буоларын иһитиннэрдилэр. Ону тэҥэ бэс ыйыгар Р. И. Константинов — Дьоруой Арамаан үбүлүөйдээх ыһыаҕар ыытыллар сылгыһыт күрэҕэр кыттар баҕалаахтарын биллэрдилэр. Бу тэрээһин "Диалог поколений. ВПК "Альфа" бырайыак чэрчитинэн ыытылынна.