Оскуолабытыгар байыаннай-патриотическай кулууп чилиэннэригэр толору усулуобуйа тэрилиннэ — 20 мая 2026 г. в 02:23:12.089
Оскуолабытыгар байыаннай-патриотическай кулууп чилиэннэригэр толору усулуобуйа тэрилиннэ Оскуолабытыгар спортивнай былаһааккатыгар сонун тэрээһин үрдүк таһымҥа ааста. Икки мөлүйүөн солкуобай кэриҥэ сууммалаах Ил Дархан гранын 2025 сыллаах «Диалог поколений. ВПК «Альфа» кыайыылаах бырайыагын чэрчитинэн байыаннай-патриотическай кулууп чилиэннэригэр толору усулуобуйа тэрилиннэ. Саҥа параднай формалар, дьарыкка туттуллар винтовкалар, АК-74 макеттара уонна магазиннара, ОЗК сакаастанан кэллилэр. Ону таһынан «Двойная полоса препятствий” үөрэтэр уонна эти-хааны эрчийэр комплекс ылылынна. Үөрэх тэрилтэлэригэр, патриотическай кулууптарга, спортивнай стадионнарга уо.д.а туруорарга ананан оҥоһуллубут сыаналаах тэрил (уопсай сууммата — 980 тыһ.солкуобай.) Москва к. ООО «Грант Н» тэрилтэ “Спортимпериал” маҕаһыыныттан сакаастанан, муус устар ыйга аҕалыллыбыта. Бэлэм хомулла сылдьар комплект «Ров», «Одиночный окоп», «Стенка с двумя проломами», «Забор с наклонной доской», «Разрушенная лестница» уонна «Лабиринт» диэн тус-туспа конструкциялардаах. ГОСТ -ка толору эппиэттиир анал сертификаттаах. Биир үчүгэйэ, атылыы моһол линиялаах буолан, икки бөлөх тэҥҥэ дьарыктаныан сөп. Саҥа турбут спортивнай тутууга оҕону сымса, күүстээх,тулуурдаах буоларга эрчийии – үүнэр көлүөнэни эт-хаан, өй-санаа өттүнэн сайыннарыы уонна патриотическай иитии сүрүн соруктарыгар туһуланар үлэ биир сүрүн хайысхата буолар. Дойду былааҕа өҥнөөх шардары туппут үөрэнээччилэр, үлэһиттэр ытыстарын тыаһынан доҕуһуоллатан, кыһыл лиэнтэни үөрүүлээх быһыыга-майгыга “Одьулуун нэһилиэгэ” тыа сирин түөлбэтин баһылыга Людмила Ефремова, улуустааҕы үөрэх управлениетыттан начальнигы солбуйааччы Афанасий Максимов, директор Иннокентий Бекянов быстылар. Бу дьаһалга “Одьулуун нэһилиэгэ” тыа сирин түөлбэтин баһылыга Людмила Ефремова, директор Иннокентий Бекянов, ветеран-учуутал Николай Климов, бырайыак сүбэһитэ Ольга Кардашевская өйөбүл буоллулар. Тэрээһиҥҥэ улуус үөрэҕин салалтата, байыаннай дьайыы бэтэрээннэрэ, Одьулуун “Дархан” эр дьонун түмсүүтэ, нэһилиэк тэрилтэлэрэ, оскуола коллектива уонна улуус оскуолаларын байыаннай кулууптара кыттыыны ыллылар. Оскуола эр дьонун хамаандата күүстээхтик үлэлээн конструкцияны кылгас кэм иһигэр хаачыстыбалаахтык туруордулар. Манна даҕатан эттэххэ, оскуолабыт базатыгар сыллата ыытыллар 5 хонуктаах улуус байыаннай-полевой сборугар 12 оскуолаттан 98 уол оҕо кыттыыны ыла сылдьар. Бүгүҥҥү дьаһалга, урукку сылларга Россия таһымыгар тиийэ оскуола аатын чиэстээхтик көмүскээбит «Альфа» БПК салайааччыта, ветеран-учуутал Николай Климов мустубут хамаандалары эҕэрдэлээтэ. 2003 сылтан улууска маҥнайгы сбор 200 тахса оҕолоох ыытыллыбытын эттэ. Сбор кыттыылаахтарыгар ситиһиини баҕарда. Үөрүүлээх быһыыга мустубут дьон «Двойная полоса препятствий” үөрэтэр уонна эти-хааны эрчийэр комплексы дуоһуйа көрөн,астынан тарҕастылар. Бу хамсааһын уонна Одьулуун орто оскуолатын иһинэн үлэлиир “Эйгэ” коммерческайа суох общественнай тэрилтэ уонна бүтүн коллектив көҕүлээһининэн тэриллэр. Инникитин бырайыак былаанынан элбэх тэрээһин ыытыллара күүтүллэр. Бырайыак хамаандата