Олох суолугар үктэнэр кэммитигэр — сэрэхтээх буолуу.
Олох суолугар үктэнэр кэммитигэр — сэрэхтээх буолуу. Чурапчы улууһун үөрэҕин салалтатын сыллааҕы былаанынан, сааһын ситэ илик оҕолор буруйу оҥорботторун сэрэтэр улуустааҕы хамыыһыйатын (КДНиЗП) дьаһалынан, балаҕан ыйын 29 күнүттэн алтынньы 13 күнүгэр, Чурапчы улууһун үөрэҕин салалтатын иитии уонна эбии үөрэхтээһин, информационно-аналитическай салаа специалистара, Чурапчытааҕы ис дьыала уорганын саастарын ситэ илик оҕолорго сэрэтэр үлэни тэрийэр инспектордар, психологическай-педагогическай, медицинскэй уонна социальнай өҥөнү оҥорор киин, "Бастыҥнар хамсааһыннара" Бүтүн Арассыыйатааҕы общественнай государственнай оҕо уонна ыччат хамсааһынын Чурапчы улууһун отделениятын специалистара - улууспут бары оскуоларыгар сырыылара саҕаланна. Бүгүн, балаҕан ыйын 29 күнүгэр, И.Е.Федосеев-Доосо аатынан Дириҥ агро-оскуолатын уонна Одьулуун орто оскуолатын үөрэнээччилэрин, педагогтарын уонна төрөппүттэрин көрсөн кэпсэтиини тэрийдилэр. Дириҥнээҕи агро-оскуолаҕа 95 үөрэнээччи, 27 учуутал уонна төрөппүт мустан иһиттилэр. Одьулуун орто оскуолатыгар 38 үөрэнээччи, 22 улахан киһи бу сэрэтэр үлэҕэ кыттыһан, бэйэлэригэр сөптөөх түмүгү оҥоһуннулар. Хайа да кэмҥэ оҕо — норуот кэскилэ, инники эрэлэ. Кини сырдыкка, кырдьыкка тардыһар ыраас дууһата, саҥаны билэ-көрө сатыыр баҕата — бу биһиги үөрүүбүт. Ол эрээри, аныгы олох сүүрүгэ күүстээх. Сибээс ситимэ сайыннаҕын аайы, куһаҕан санаалаах дьон угаайылара эмиэ уустугурар. Кэлиҥҥи кэмҥэ ыччат дьон «дропперство» диэн хара дьайыыга киирэн биэриилэрэ элбээбитэ биһигини, үөрэх үлэһиттэрин, улаханнык дьиксиннэрэр. «Дроппер» диэн тугуй? Бу — уоруллубут үбү-харчыны атын счекка көһөрөөччү, хара дьыалаҕа кыттыгас буолан, бэйэтэ да билбэтинэн буруй ситимигэр киирээччи. Оҕо барахсан, түргэн харчыга ымсыыран, бэйэтин счетун, каартатын уларсар эбэтэр счетугар "алхас" киирбит харчыны этиллибит счетка ыытан бэйэтэ да билбэтинэн улахан буруйга кыттыһар. Бу — оҕо ыраас аатын-суолун хараардааһын, инники олоҕор күлүк түһэрии буолар. Биһиги, үөрэх-иитии үлэһиттэрэ, оҕолорбутун, төрөппүттэри, учууталлары бу албын угаайыттан харыстыыр аналлаахпыт. Улууспут хас биирдии оскуолатыгар бу кэпсэтии салҕаныаҕа. Биһиги оҕолорбут өйдөрө-санаалара ыраас, сүрэхтэрэ мэлдьи сырдык буоларын туһугар, хас биирдиибит эппиэтинэһи сүгэбит" - диэн өйдөтөн этэр Чурапчы улууһун Үөрэҕин салалтатын иитии уонна эбии үөрэхтээһин салаатын салайааччыта Евгения Ивановна Чичигинарова. Оҕону сэрэтии — кинини куттааһын буолбатах, киниэхэ олох муударастарын иҥэрии. Биһиги кини кутталы сатаан билэр, ону тумнар кыахтаныан баҕарабыт. Бу — оҕону бэйэтин уонна инники олоҕун көмүскүүргэ үөрэтии.