Үтүө үгэс салҕанар: «Дьиэ кэргэн — ааҕыы биһигэ» бэстибээл түмүктэннэ.
Үтүө үгэс салҕанар: «Дьиэ кэргэн — ааҕыы биһигэ» бэстибээл түмүктэннэ. Бүгүн Одьулуун оскуолатыгар Оҕо кинигэтин нэдиэлэтин, XXIII төгүлүн ыытыллар «Весенний калейдоскоп чтения» улуустааҕы дьиэ кэргэн бэстибээлин, «Ыал саргыта» улуустааҕы пилотнай бырайыак чэрчитинэн ыытыллар бэстибээл буолан ааста. Ааҕыыга дьиэ кэргэн болҕомтотун тардар, төрөөбүт тылы байытар сыаллаах, үгэскэ кубулуйбут бэстибээлгэ, кыттыыны ыллылар Одьулуун орто оскуолатын 1-5 кыл. үөрэнээччилэрэ, төрөппүттэр, кылаас салайаачылара. Тэрийээччилэр - Одьулуун орто оскуолатын бибилэтиэкэтэ уонна Одьулуун нэһилиэгин модельнай бибилэтиэкэтэ. Бэстибээл үөрүүлээх чааһын Куличкиннар дьиэ кэргэн Суорун Омоллоон 120 сыллаах үбүлүөйүгэр анаан «Дьэрэкээн оҕолор» остуоруйанан театрализованнай туруоруунан саҕалаатылар. Салгыы тыа сирин түөлбэтин Одьулуун нэһилиэгин баһылыга Людмила Ефремова, Одьулуун орто оскуолатын директоры иитэр үлэҕэ солбуйааччы Алена Барашкова саалаҕа мустубут кыттааччылары, көрөөччүлэри эҕэрдэлээтилэр, ситиһиини баҕардылар. Улуустааҕы «Ыал саргыта» пилотнай бырайыак иһинэн ыытыллар «Ааҕар саха сайдам ыала» дьиэ кэргэнинэн ааҕыы күрэҕин итиэннэ «Төрөөбүт тыл биһигэ» ийэ тылынан оҕо ааҕыытын тэнитэр киин былаанын туһунан Одьулууннааҕы модельнай бибилэтиэкэ сэбиэдиссэйэ Таисия Григорьева сырдатта. Оскуола педагог-бибилэтиэкэрэ Туйара Максимова тэрээһин түһүмэхтэрин уонна дьүүлүүр сүбэ састаабын билиһиннэрдэ. Бэстибээл икки хайысханан ыытылынна: биэс түһүмэхтээх дьиэ кэргэн күрэҕэ итиэннэ "Сөбүлүүр кинигэм геройа" оҥоһук күрэҕэ. «Ааҕар дьиэ кэргэн» түһүмэххэ хамаандалар «Боотур Уус сыдьааннара» муниципльнай программа иитинэн ыытыллар «Саамай ааҕар кылаас» бырайыак 3-с уонна 4-с чиэппэрдээҕи сахалыы тылынан суруллубут айымньыларынан викторинаҕа кытыннылар. «Тыыннаах тыл» (экспромт-инсценировка) түһүмэххэ дьиэ кэргэттэр «Саамай ааҕар кылаас» бырайыак айымньыларын бэриллибит бириэмэҕэ тута билсэн, ааҕан баран сценаҕа оонньоон көрдөрдүлэр. «Өс хоһооно – өбүгэ номоҕо» түһүмэх хамаандалар саха өһүн хоһоонун төһө билэллэрин оонньуу нөҥүө тургутта. «Сытыы харах, сымса өй» түһүмэх олус сытыытык ааста. Кыттааччылар өйгө тутар дьоҕурдара, төһө болҕомтолоохторо учуоттанна. «Тыл — үйэ аргыһа» түһүмэх үгүс дьон болҕомтотун тарта. Хамаандалар саҥа кэм тылларын (тиэрминнэри) сахалыы-нууччалыы тылбаастарын таайыыга бириэмэҕэ күрэхтэстилэр. Дьүүллүүр сүбэ састаабыгар үлэлээтилэр: Алена Барашкова, директор иитэр үлэҕэ солбуйааччыта; Екатерина Дыдаева, директор иитэр үлэҕэ сүбэһитэ; Надежда Кривошапкина, социальнай педагог; Надежда Кардашевская, алын сүһүөх кылаастарын учуутала; Марина Тимофеева, уруһуй уонна технология учуутала. Бэстибээл кыттыылаахтара «Ааҕар саха сайдам ыала» дьиэ кэргэнинэн ааҕыы улуустааҕы күрэҕэр ситиһиилээхтик кыттыбыт Сибиряковтар, Седалищевтар, Пономаревтар дьиэ кэргэттэрин видеороликтарын сэргии көрдүлэр. Сахалыы хомоҕой тылынан Семен Данилов – «Сүрэҕэ суох сүүс сүбэлээх» хоһоонунан эҕэрдэлээбит, маҥнайгы кылаас үөрэнээччитин, Айыысиэн Дьячковскайы астына иһиттилэр. Маны таһынан, быйылгы бэстибээл биир уратытынан ааспыт 2025 с. улуустааҕы бэстибээл каыйыылаахтара Лена Семеновна, Уйгун, Тускун Карповтар ыытааччы быһыытынан кыттыылара буолла. Түмүккэ, ааҕар дьиэн кэргэн күрэҕин кыайыылаахтара билиннилэр: Добун сурук I үрдэлэ – Брызгаевтар дьиэ кэргэн, 5 кылаас; Добун сурук II үрдэлэ – Куличкиннар дьиэ кэргэн, 1 кылаас; Добун сурук III үрдэлэ – Седалищевтар дьиэ кэргэн, 4 кылаас; Анал аат – Дьячковскайдар дьиэ кэргэн, 3 кылаас. Хамаандалар добун суругунан, минньигэс бирииһинэн наҕараадаланнылар уонна нэһилиэк дьаһалтатыттан кинигэ бэлэх туттулар. "Сөбүлүүр кинигэм геройа" оҥоһук күрэҕин кыайыылаахтара салгыы XXIII төгүлүн ыытыллар «Весенний калейдоскоп чтения» улуустааҕы дьиэ кэргэн бэстибээлгэ кыттар чиэскэ тигистилэр. Ити курдук, «Дьиэ кэргэн — ааҕыы биһигэ» бэстибээл ситиһиилээхтик ааста. Бар дьоммутугар кинигэни доҕор оҥостон өссө үрдүк ситиһиилэргэ тиийэргитигэр баҕарабыт. Педагог-бибилэтиэкэр Туйара Максимова