Одьулуун оскуолатын уолаттара Ил Дархан гранын иитинэн
Одьулуун оскуолатын уолаттара Ил Дархан гранын иитинэн байыаннай-спортивнай сборга түмүстүлэр Кулун тутар 20-21 күннэригэр, Одьулуун орто оскуолатыгар байыаннай-спортивнай сбор үрдүк тэрээһиннээхтик ааста. Сбор «Диалог поколений. ВПК «Альфа» Ил Дархан гранын 2025 сыллаах кыайыылаах бырайыагын чэрчитинэн ыытылынна. Тэрээһин уол оҕону патриотическай иитиигэ, эт-хаан өттүнэн сайыннарыыга, аҕа оруолун үрдэтиигэ туһуланар. Икки эрийсиилээх күн иһигэр 5-11 кылаас уолаттара үс хамаандаҕа арахсан хас даҕаны хайысханан тургутугу ситиһиилээхтик аастылар. Ол курдук, строевой хаамыы, сыал ытыы, дойду историятын билиигэ интерактивнай оонньуу, военизированнай эстафета, ОФП, автоматы ыһыы уонна хомуйуу күрэхтэригэр илин-кэлин түһүстүлэр, тактическай медицина маастар-кылааһыгар элбэх саҥаны биллилэр-көрдүлэр. Уолаттар дьуһуурустубаҕа туран, оскуолаҕа хонон, бириэмэлэрин сэлэспэтэ суох туһалаахтык атаардылар. Ону таһынан, байыаннай дьайыы кыттыылаахтара, бииргэ төрөөбүт Алексей, Анатолий Петровтар ийэлэригэр М. И. Петроваҕа муус хаалааһыныгар көмө оҥордулар. Главнай судьуйанан өр сылларга республикаҕа инники күөҥҥэ сылдьыбыт «Альфа» ВПК төрүттээччитэ, Климов Н. М. үлэлээтэ. Николай Михайлович сүбэтэ, көмөтө, ньымалара кулууп эдэр, эрчимнээх салайааччыта А. К. Омуровка инники үлэтигэр тирэх буолуоҕа. Ветеран учуутал туһалаах дьарыктара хамаандалар эрдээх санааларын бөҕөргөттө, сүргэлэрин көтөхтө. Биир сонун түгэнинэн Моҕоллой күөлүгэр куйуур буолла. Манна үлэһиттэр Аржаков А. А., Колесов Н. Н., Иовлев А. А. сааскы куйуурдааһын кистэлэҥнэрин оҕолорго билиһиннэрдилэр. Күөх Боллох көмүс хатырыктааҕыттан бэрсэн үөрүү улаатта. Бу дьаһал үрдүк таһымнаахтык ыытылларыгар өйөбүл буоллулар: «Одьулуун нэһилиэгэ» тыа сирин түөлбэтин баһылыга Ефремова Л. В., ЧАТК аграрнай салаатын салайааччыта Баягантаев П. С., ОБЗР преподавателэ Карпов В.Н., «Дархан» Одьулуун эр дьонун түмсүүтүн салайааччыта Аржаков А. А., баһаарынай чаас начальнига Потапов И. И., байыаннай дьайыы ветераннарын түмсүүтүн бэрэссэдээтэлэ Адамов И. А., анал байыаннай дьайыы ветерана Сорокоумова А. И., аҕалар, оскуола агро хайысхаҕа үлэтин салайааччыта Аржакова А. Р., директор Бекянов И. И. Оскуола эр дьоно туора турбакка, биир киһи курдук кыттан, түмсүүлээхтэрин көрдөрдүлэр. Бекянов Р. И., Аржаков Э. А., Бекянов И. И. куратордарынан үлэлээтилэр. Карпов Р. Н., Омуров А. К. сбору иилээн-саҕалаан ыыттылар. Тотоойу астаах остуолу повардар Мандарова Н. Н., Дьячковская М. А. тэрийдилэр. Бэлиэтээн эттэххэ, аҕалар военизированнай эстафетаҕа, куйуурга кыттыбыттара хайҕаллаах. Уол оҕону иитиигэ аҕа улахан суолтаны биэрэрэ көһүннэ. Түмүккэ, Алгыс Халгаев этэрээтэ бастаата, иккис миэстэҕэ Кэскил Карпов, үһүскэ Эрэл Потапов, Арчын Абрамов этэрээттэрэ тигистилэр. Маны тэҥэ, биирдиилээн түмүккэ бастыҥнары чиэстээтилэр. Буулдьанан ытыыга: 1 миэстэ-Миша Яковлев; 2 миэстэ- Ренат Коркин; 3 миэстэ- Ваня Степанов. ОФП түмүгүнэн: 1 миэстэ-Кэскил Карпов; 2 миэстэ- Ренат Коркин; 3 миэстэ- Алгыс Халгаев; 4 миэстэ-Степа Аржаков. Икки күн устата уолаттар патриотическай тыыҥҥа уһуйуллан, эт-хаан, өй-санаа өттүнэн тургутуулары ааһан, аҕаларын кытта бииргэ күрэхтэһэн, астынан тарҕастылар. “Эйгэ” коммерческайа суох общественнай тэрилтэ уонна Одьулуун орто оскуолатын көҕүлээһининэн маҥнайгытын ыытыллыбыт байыаннай-спортивнай сбор тэрээһинэ ситиһиилээхтик түмүктэннэ. Бырайыак хамаандата