💐 Бүген Югары Шытсу авылында яшәүче хөрмәтле акъәбиебез, тыл ветераны Рәхимә Шакирҗано...
💐 Бүген Югары Шытсу авылында яшәүче хөрмәтле акъәбиебез, тыл ветераны Рәхимә Шакирҗанова үзенең 101 яшьлек күркәм гомер бәйрәмен билгеләп үтә! ❤️ 🌸 Шушы истәлекле көн уңаеннан Рәхимә апаны котларга Саба муниципаль районы башлыгы урынбасары Расих Закирҗанов, социаль яклау бүлеге җитәкчесе Лилия Гайнетдинова, Түбән Шытсу авыл җирлеге башлыгы Булат Мәүлетов килде. 🌾 Рәхимә апаның гомер юлы — сабырлык, батырлык һәм фидакарь хезмәт үрнәге. Нибары 16 яшеннән үк ул авыр хезмәткә җигелә: урман кисә, окоп казый, Казанда тоз чыгаруда көч куя. Сугыш елларының барлык авырлыкларын үз җилкәсендә күтәргән тыл ветераны тыныч тормышта да хезмәттән аерылмый. Гомер буе «Беренче Май» колхозында намус белән эшләп, лаеклы ялга чыга. ❤️ Тормыш иптәше белән бергә дүрт бала тәрбияләп үстерәләр. Бүгенге көндә Рәхимә апа улы Мөдәрис һәм килене Гөлнурның кадер-хөрмәтен, җылы тәрбиясен тоеп гомер кичерә. ✨ 101 еллык гомер — ул үзе бер тарих, бер гасырлык хатирәләр, сынаулар, шатлыклар һәм җиңүләр белән сугарылган олы тормыш юлы. Рәхимә апа кебек хезмәт сөючән, сабыр, көчле рухлы өлкәннәребез — безнең горурлыгыбыз, яшь буын өчен олы үрнәк! 🌹