🌸 Бүген Шәмәрдән авылында гомер кичерүче, тормышның ачысын да, төчесен дә татып, авыр ...
🌸 Бүген Шәмәрдән авылында гомер кичерүче, тормышның ачысын да, төчесен дә татып, авыр сынаулар алдында сынмыйча-сыгылмыйча яши белгән Хәмитҗанова Сәлия Нәҗметдин кызы үзенең 96 яшьлек күркәм гомер бәйрәмен билгеләп үтте. 🌸 Олуг юбилее уңаеннан Сәлия апаны Саба районы социаль яклау идарәсе җитәкчесе Лилия Гайнетдинова һәм Шәмәрдән авыл җирлеге башлыгы Альберт Вәлиев тәбрикләде. Алар юбилярга ихлас котлау сүзләрен җиткереп, ныклы сәламәтлек, күңел тынычлыгы һәм хәерле гомер теләделәр. 🌸 Сәлия Нәҗметдин кызы Кукмара районының Тарлау авылында дөньяга килә. Аның балачагы җиңел елларга туры килми. Мәктәптә нибары ике ел гына белем алырга насыйп була. Гаиләдәге кечкенә сеңелләрен карау, йорт эшләрендә булышу аның нәни иңнәренә иртә төшә. Шулай итеп, балачактан ук хезмәтнең тәмен, тормышның җаваплылыгын тоеп үсә ул. 🌸 1953 елда Сәлия апа Зөфәр исемле егет белән гаилә кора. Тормыш иптәше белән бергәләп бер ул һәм бер кыз тәрбияләп үстерәләр. 1960 елга кадәр колхозда хезмәт куя. Соңрак гаиләләре белән Шәмәрдәнгә күченеп киләләр. Биредә Сәлия Нәҗметдин кызы башта «Заготзерно» предприятиесендә, аннары балалар бакчасында эшли. Озак еллар намуслы хезмәт куеп, лаеклы ялга тире комбинатыннан китә. 🌸 96 еллык гомер юлына күпме хезмәт, күпме шатлык һәм сагыш сыйган! Язмыш Сәлия апаны зур югалтулар белән дә сыный. Ул иң якын кешеләрен – сөекле тормыш иптәшен, газиз улын һәм кызын соңгы юлга озату ачысын кичерә. Ана йөрәге өчен әйтеп бетергесез авыр булган бу хәсрәтләр аның күңелендә мәңге төзәлмәс яра булып саклана. 🌸 Шулай да Сәлия Нәҗметдин кызы – язмыш сынауларына бирешмичә, сабырлык һәм түземлек белән гомер юлын дәвам итүче өлкән буын вәкиле. Аның тормыш юлы – фидакарь хезмәт, гаиләгә тугрылык, рухи ныклык үрнәге.