Бэс ыйын 27 күнүгэр Улуу Туймаада үрүҥ тунах ыһыаҕар, «Симэх» норуот ускуустубатын уонн... — 29 июня 2026 г. в 13:52:00.277
Бэс ыйын 27 күнүгэр Улуу Туймаада үрүҥ тунах ыһыаҕар, «Симэх» норуот ускуустубатын уонна уус—уран оҥоһуктарын Национальнай киинин түһүлгэтигэр 1 Өрөспүүбүлүкэтээҕи "Туос үгэһэ" диэн туос маастардарын бэстибээлэ буолла. Үөрүүлээх быһыыга Нам улууһун норуотун маастарыгар, маастар-педагогка Татьяна Макаровна Соловьеваҕа "Мастер народных художественных промыслов Республики Саха (Якутия)" бэлиэни туттардылар. Бу күн Нам улууһун 1-Хомустааҕыттан "Төрүт туос" түмсүүлэр (сал. Баишева В. Д.) быыстапкаҕа, туос иһиттээх сандалы күрэҕэр ситиһиилээхтик кытыннылар. Ол курдук "Туос иһиттээх сандалы" күрэҕэр 1 степеннээх лауреат буолан, 10 тыһ. сууммалаах сертификат ыллылар. Бу бэстибээл чэрчитинэн туос иһити тигиигэ үгүс ыччаты уһуйбут, туос уран оҥоһуктарын Нам улуууһугар сайыннарбыт, Нам улууһун уонна Бастакы Хомустаах бочуоттаах киһитэ, норуот маастара, үлэ тыыл ветерана Новгородова Марфа Иннокентьевна технологиятынан "Сайдыы" оҕо айымньытын дьиэтин коллектива туостан ыас өрүүтүгэр маастар кылаас көрдөрдүлэр. Туостан ыаһы өрүүнү Нам улууһун норуотун маастара, маастар-педагог Татьяна Макаровна Соловьева уонна Нам улууһун норуотун маастара, "Мастер народных художественных промыслов Республики Саха (Якутия)" бэлиэ хаһаайына, эбии үөрэхтээһин педагога, "Туосчаан" куруһуок салайааччыта Варвара Дмитриевна Баишева салайыыларынан ыытылынна. Туос ыас олус табыллан, дьон сэргэ үөрэ-көтө амсайан, ыас оҥоруутун көрөн-истэн дуоһуйан тарҕастылар.