Шәрык клубы – Саба районының Икшәрмә авылында🌲 — 9 июня 2026 г. в 13:11:50.082
Шәрык клубы – Саба районының Икшәрмә авылында🌲 Бүген Шәрык клубы җитәкчесе Гөлдания Зиннәтова Саба районының Икшәрмә авылында урнашкан балалар өчен сәламәтләндерү «Солнышко» лагеренда кунакта булды. Очрашу барышында балаларга клуб эшчәнлеге турында сөйләнде, аның максатлары һәм алып барылган проектлары белән таныштырылды. Шулай ук, лагерьда ял итүчеләр татар театрының барлыкка килү һәм үсеш тарихы турында кызыклы мәгълүмат алдылар. «Сменабыз бер урында 90 баланы җыйды, һәм ул балаларны спорт ягыннан үстерүгә багышланган. Тик 18 көн дәвамында балаларны спорт белән генә шөгыльләндерергә максат куелмады, иҗади яктан да үстерәсебез килә. Сабыйларның яңа белемнәр туплавын, смена файдалы булуын теләп, Шәрык клубы хезмәткәрләрен чакырырга уйланды. Күңелдә театрга карата мәхәббәт тәрбияләнсә, олы тормышта авырлыкларны җиңәргә җиңелрәк. Күңелдә иҗат яши икән, кеше һичшиксез матурлыкны күрә белә», – диде әйдаман Илүзә Галимҗанова. Чара ахырында балалар татар театры тарихына багышланган фильм карадылар. Викторина үткәрелде һәм бүләкләр тапшырылды. Очрашу, җылы һәм эчтәлекле атмосферада узып, катнашучыларда татар мәдәнияте һәм театр сәнгатенә карата кызыксыну уятты.