Словесное приношение протоиерея Артемия Владимирова
Без категории · 25 октября 2026 г.
АКАФИСТ СВЯТОМУ СТРАСТОТЕРПЦУ ЦАРЮ НИКОЛАЮ
АКАФИСТ СВЯТОМУ СТРАСТОТЕРПЦУ ЦАРЮ НИКОЛАЮ Кондак 1 Возбра́нный Воево́до и Го́споди, ца́рствуяй над все́ми язы́ки, возвеща́яй им во́лю Твою́, благу́ю, уго́дную и соверше́нную, низпошли́ и мне, недосто́йному, си́лу Ду́ха Твоего́ Свята́го, да просла́влю ди́внаго во царе́х уго́дника Твоего́ и от се́рдца возглашу́ ему́: Ра́дуйся, Царю́ Нико́лае, Пома́занниче Бо́жий. Икос 1 А́нгельских престо́л и госпо́дствий всеси́льный Тво́рче, возводя́й царе́й на престо́лы во о́браз держа́вныя си́лы и прему́дрости Твоея́, благода́рственная принося́ще Ти, ублажа́ем свята́го Пома́занника Твоего́ Никола́я си́це: Ра́дуйся, от ве́ка к ца́рскому пома́занию предуста́вленный, Ра́дуйся, на земно́е ца́рство Небе́сным Царе́м избра́нный, Ра́дуйся, на престо́л всеси́льным Про́мыслом возведе́нный, Ра́дуйся, благода́тию прему́дрости осене́нный, Ра́дуйся, зако́н, пра́вду и суд в еди́ном лице́ яви́вый, Ра́дуйся, поста́вленный на правле́ние целожи́зненное, Ра́дуйся, земны́й о́бразе Небе́снаго Царя́, Ра́дуйся, Царю́ самодержа́вный, Ра́дуйся, от Всемогу́щаго Бо́га власть прие́мый, Ра́дуйся, главо́ наро́да Ру́сскаго, Ра́дуйся, держа́вных ро́дичей свои́х украше́ние, Ра́дуйся, Царя́ Миротво́рца сы́не кро́ткий и ми́лостивый, Ра́дуйся, Царю́ Нико́лае, Пома́занниче Бо́жий. Кондак 2 Ви́дящи гряду́щая я́ко настоя́щая и промышля́ющи о Святе́й Руси́, Единоца́рственная Тро́ица избра́ на престо́л Ру́сский Пома́занника, в кро́тости Боголюбе́зному Дави́ду подража́вшему, да сокруше́на бу́дет горды́ня язы́ческая и да воспою́т лю́дие вернопо́дданнии: Аллилу́иа. Икос 2 Разуме́юще все бога́тство прему́дрости Бо́жией в самодержа́внем о́бразе правле́ния, има́мы се́рдце сокруше́нно, я́ко не сохрани́хом сей неизрече́нный дар Го́спода Вседержи́теля наро́ду на́шему, оба́че воспомина́юще труды́ и по́двиги после́дняго Ру́сскаго Царя́, с благодаре́нием рече́м ему́: Ра́дуйся, сла́вный наследни́че держа́вы Рю́риковичей, Ра́дуйся, свята́я о́трасле Рома́нова ко́рене, Ра́дуйся, я́ко ору́жием благоволе́ния Госпо́дь венча́ тя, Ра́дуйся, я́ко еле́ем ра́дости Бог твой пома́за тя, Ра́дуйся, над де́лы руку́ Его́ поста́вленный, Ра́дуйся, я́ко внят Госпо́дь угото́ванию се́рдца твоего́, Ра́дуйся, я́ко Бог испо́лни тя весе́лия с лице́м Свои́м, Ра́дуйся, я́ко препоя́са тя Бог си́лою на брань, Ра́дуйся, я́ко помяну́ Госпо́дь вся́ку же́ртву твою́ и всесожже́ние твое́ ту́чно бысть, Ра́дуйся, я́ко возложи́ Бог на главу́ твою́ вене́ц от ка́мене че́стна, Ра́дуйся, я́ко держа́вна ча́ша, упоява́ющи тя, Ра́дуйся, я́ко ви́де Госпо́дь смире́ние твое́ и оста́ви вся грехи́ твоя́, Ра́дуйся, Царю́ Нико́лае, Пома́занниче Бо́жий. Кондак 3 Си́ла и кре́пость ца́рства земна́го – в любви́ наро́да к Це́ркви Христо́вой и ве́рном служе́нии Пома́заннику Бо́жию, ею поста́вленному, да ничто́же успе́ют кова́рнии врази́ супроти́в свята́го едине́ния Главы́ и те́ла – Царя́ и его́ по́дданных, сла́вящих Единодержа́вную Тро́ицу: Аллилу́иа. Икос 3 Я́же име́хом, не сохрани́хом; потеря́вше, седо́хом и пла́кахом, на ве́рбиих пове́сивше орга́ны на́шя, я́коже дре́вле пленне́нии иуде́е на земли́ чужде́й. Благочести́вии же пре́дцы на́ши, ви́дяще на престо́ле но́ваго Пома́занника, возопи́ша ему́ с весе́лием: Ра́дуйся, во Успе́нский собо́р торже́ственне введе́нный, Ра́дуйся, испове́дание ве́ры во всеуслы́шание возгласи́вый, Ра́дуйся, стра́шную кля́тву Бо́гови прине́сый, Ра́дуйся, ца́рскаго миропома́зания удосто́енный, Ра́дуйся, причаще́ния Святы́х Та́ин в алтаре́ сподо́бивыйся, Ра́дуйся, ца́рским венце́м укра́шенный, Ра́дуйся, почте́нный ски́петром вла́сти, Ра́дуйся, дла́нию свое́ю прия́вый держа́ву, Ра́дуйся, благогове́йне возложи́вый вене́ц на Цари́цу, Ра́дуйся, возлю́бленный наро́дом Ру́сским, Ра́дуйся, Свя́тую Русь па́че жи́зни возлюби́вый, Ра́дуйся, жизнь с любо́вию за дру́ги своя́ положи́вый, Ра́дуйся, Царю́ Нико́лае, Пома́занниче Бо́жий. Кондак 4