Бэс ыйын 24 күнүгэр «Дорҕоон» түһүлгэҕэ Арассыыйаҕа Норуоттар Сомоҕолоһууларын, Саха Ө... — 24 июня 2026 г. в 22:51:36.688
Бэс ыйын 24 күнүгэр «Дорҕоон» түһүлгэҕэ Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, Үөһээ Бүлүү улууһугар Үөрэҕирии ситимэ төрүттэммитэ 150 сылыгар аналлаах «Үөрэх-билии биһигэ – Үөһээ Бүлүү» Үрүҥ Тунах ыһыах иитинэн «Учуутал-эн үрдүк ааккынан» учуутал дьиэ кэргэттэр улуустааҕы күрэхтэрин үрдүк тэрээһиннээхтик ыытылынна. Норуот айымньытын киинин специалистара Сайын Саввинова уонна Афанасий Руфов бу күрэҕи бэрт үрдүк таһымҥа уран тылы хомоҕойдук холбоон, ыпсаран, ситэрэн-хоторон ыыттылар уонна чахчы да бырааһынньыктааҕы настарыанньаны бэлэхтээтилэр. Бу ураты ис хоһоонноох, ыһыах ис хоһоонун толору арыйар күрэххэ барыта 7 дьиэ кэргэн: Дүллүкүттэн Айталина, Радомир Руфовтар, Намтан Антонина, Геннадий Аввакумовтар, Оҥхойтон Лиана, Станислав Михайловтар, Тамалакаантан Наталья, Ньургустаан Бабарановтар, Үөһээ Бүлүү сэлиэнньэтиттэн Сахаяна, Михаил Ченоховтар, Үөдүгэйтэн Христина, Леонид Огочоновтар уонна Кэнтиктэн Сайаана, Ромен Ивановтар кытыннылар. Дьиэ кэргэттэр дьулуурдарын, талааннарын сыаналыыр Тойон сүбэҕэ СӨ үтүөлээх учуутала, РФ уопсай үөрэхтээһинин бочуоттаах үлэһитэ Наталья Васильевна Чуручанова, улуустааҕы үөрэх салалтатын салайааччытын солбуйааччы Айаал Мохначевскай, СӨ култууратын туйгуна, култуура бэтэрээнэ Аграфена Долгунова, улуустааҕы ыччат уонна дьиэ кэргэн политикатын отделын салайааччыта Зоя Колосова үлэлээтилэр. Күөн-күрэс барыта 3 түһүмэҕинэн ыытылынна. Бастакытынан, «Алаһа дьиэм – дьоллоох уйам» диэн сахалыы мааны таҥастаах сыанаҕа тахсан уустаан-ураннаан бэйэни билиһиннэрэр түһүмэх. Иккиһинэн, «Талаан уонна дьоҕур» уонна үсүһүнэн, «Дьиэ кэргэн ураты эйгэтэ» диэн дьиэ кэргэн үтүө үгэстэрин билиһиннэрэр түһүмэхтэр. Бу үс түһүмэх усталаах-туоратыгар 7 дьиэ кэргэн олох араас хайысхатыгар: тыа хаһаайыстыбатыгар, бэйэни олохтоох аһынан-үөлүнэн хааччыныыга уонна оҥорон таһаарыыга, спортка, айылҕаны кытта алтыһыыга, оҕолору өбүгэ муударай үгэһигэр сыһыарыыга, иистэниигэ, уһаныыга, бэл диэтэр, төрүччүнү дириҥник хасыһан үөрэтиигэ оҕолорун кыра эрдэхтэриттэн сыһыараары сылайары аахсыбат, утумнаах үлэни ыыталларын сөҕө-махтайа, киэн тутта көрдүбүт. Аны талааннарын көрүөҥ. Бу үҥкүүһүттэрин, ырыаһыттарын! Төрүт культураларынан чахчы киэн туттан туран, сахалыы музыкальнай инструменнарынан доҕуһуоллатан сахалыы ырыаларын тардан кэбистилэр. Дьүүллүүр сүбэ түмүгү таһаарар долгутуулаах кэмигэр бу күрэххэ кыттыбыт ыаллары бэйэлэрин нэһилиэктэрин дьаһалталара, үлэлиир коллективтара уонна аймахтара мустан, үрдүк сыанаттан эҕэрдэлээтилэр уонна сыаналаах бэлэхтэри туттардылар. Күрэх түмүгүнэн маннык номинациялар олохтоннулар: «Билии кыһатын тутаах ыала» - Айталина, Радомир Руфовтарга, «Айылҕаттан анаммыт учуутал дьиэ кэргэн» - Наталья, Ньургустаан Бабарановтарга, «Төрүт үгэһи үйэтитэр дьиэ кэргэн» - Лиана, Станислав Михайловтарга, «Оҕоҕо сүрэхтэрин анаабыт дьиэ кэргэн» - Сахаяна, Михаил Ченоховтарга, «Билии-көрүү биһиктээх, бигэ туруктаах дьиэ кэргэн» - Антонина, Геннадий Аввакумовтарга, «Билими уонна норуот муудараһын дьүөрэлиир дьиэ кэргэн» - Христина, Леонид Огочоновтарга иҥэрилиннэ. Онтон бүгүҥҥү күрэх муҥутуур кыайыылаахтарынан Кэнтик нэһилиэгин киэн туттар, холобур оҥостор учуутал дьиэ кэргэнэ Сайаана, Ромен Ивановтар тахсан, «Кылаан чыпчаал» үрдүк аатын хаһаайыннарынан буоллулар! Кинилэргэ Феликс Павлов салайааччылаах ФЭСТ ХЭТ тэрилтэ туруорбут супер-бирииһэ - ларь-морозильник туттарылынна! Бүгүҥҥү күрэхтэһии кыайыылаахтарын истиҥник эҕэрдэлиибит! Галина Васильева