*Күндү Сахабыт сирин олохтоохторо, ыалдьыттара, болҕойуҥ!* — 19 июня 2026 г. в 21:32:23.632
*Күндү Сахабыт сирин олохтоохторо, ыалдьыттара, болҕойуҥ!* Кэмэ кэлэн, былырыын биэс харахтаах харысхал ураһата Саха сирин үрдүнэн алгыһынан көтөҕүллэн, эйгэҕэ туруоруллубута. Үйэ кэмэ уларыйар араас бэлиэлэрин, тэтимин бары билэ-көрө сылдьаҕыт. Сахаларга ураты миссия бэриллэн турар,бэйэни, чугас дьоммутун өрүһүйүү, бүтүн омукпут тыыннаах хааларын туһугар иэспитин толорор ытык кэммит кэллэ. Айыыларбыт алгыс тылын истэллэр, ылыналлар. Онон, бука бары бэс ыйын 21 күнүгэр 12чаастан бары биир кэмҥэ, ханна сылдьаргытынан бу Алгыһы ааҕан, дорҕоонноохтук саҥаран, бу харысхал ураһа өһүөтүн өрө көтөҕөн, үрдэтэн таһаарыаҕыҥ! (Бу сахаларга 100 сыл анараа өттүгэр, Саха сиригэр харысхал буолан, анаан кэлбит алгыс буолар.) Бу Алгыһы аахтахпытына, Сахабыт сиригэр сайдыы салаллыа, өлүү-сүтүү сүтүө, оҕо-ыччат ыалдьыбат буолуо, дьон эйэ дэмнээх, нус-хас олоҕо саҕаланыа. Бука бары көрдөһөр турукка киирэн, бу Алгыһы добдугураччы ааҕыаҕыҥ. Ким дьиэтигэр-уотугар, ким анаан дьону түмэн, хайдах кыайаргытынан, куйаартан күүс ылар алгыс сиэрин-туомун толоруоҕуҥ! Сүбэ буоллун, соргу буоллун! Тускуо!!! ✨Куйаар Куо✨ Үгүс өрүһүйэр аналлаах Үтүөкэннээх бэйэлээх Үрүҥ Аар Тойон! Амарах санаалаах Айыы дьонноох Аар Айыыларым! Орто туруу бараан дойду Олохтоох дьоно мустаммыт, Уруйдаан эрэбит! Аан дойду Аламаҕай дьоно кэлэммит, Айхаллаан эрэбит! Симэһин хааннаах Сиик тыыннаах, Сир дьоно үҥэн- сүгүрүйэн эрэбит! Буор сир силистэрэ Бэлиэ тылы анаан эрэбит! Урааҥхай дойдутугар, Сир ийэ дойдутугар, Алгыс күүһүн түһэрэргэ, Арчылыыр күүһү көрдөһөргө, Амарах тылы аныырбытыгар Анаан-минээн көмөлөс! Үктэнэр сирбит Илгистэн илистэн Ибигирээбэтин, Уордайан уһаарбатын, Хамсаан хаарыйбатын! Илинтэн иирсээн киирбэтин! Арҕааттан абааһы арбайдаабатын! Хотуттан хараҥа халбарыйдын! Соҕурууттан суһал сыстыбатын! Устар уһун үйэлэргэ Уруйдуу сылдьарбытыгар, Олохтоох тылынан анаатаҕыҥ буоллун! Ааһар кэтит үйэлэргэ, Айхаллаах тылынан Араҥаччылаатаҕыҥ буоллун! Үрүҥ үтүө дойдубар, Үрүҥ көмүс ураһаҕын туруордаҕыҥ буоллун! Бүппэт элбэх үйэлэргэ Биэс харахтааҕынан Бүөлээтэҕиҥ буоллун! Хаххалыыр үрүҥ халлаантан Харысхалы уурдаҕыҥ буоллун! Айыы күүһүн аҕалаҥҥыт, Үрүҥ күүһү ыытаҥҥыт, Үтүө кэм үрдээтин! Үрдүк анал тардыстын! Кэрэ эйгэ эҥэрдэстин! Алгыс баһа сыаланнын! Дом!Дом! Дом! *Тарҕатарга көмөлөһүҥ*🌿🌿🌿