♟️Үтүө киһи сырдык аатыгар саахымат турнира буолла
♟️Үтүө киһи сырдык аатыгар саахымат турнира буолла МВД уонна спорт бэтэрээнэ, юстиция подполковнига, буулдьалаах саанан ытыыга спорт маастара, Мүрү нэһилиэгин бочуоттаах олохтооҕо Ермолаев Григорий Капитонович сырдык аатыгар аҕам саастаахтар декадаларын чэрчитинэн саахымат турнира ыытылынна. Турнир саахымат сүгүрүйээччилэригэр улахан интэриэһи тардан, Мэҥэ Хаҥаластан, Суоттуттан, Тумултан, Дүпсүнтэн, Уһун Күөлтэн, Тандаттан, Курбуһахтан, Сыырдаахтан, Чараҥтан, Мындаабаттан, Бороҕонтон барыта 23 киһи кыттыыны ылла. Эр дьон 12 тур, дьахталлар 10 тур, бары дуоһуйа күрэхтэстилэр, астыннылар. Хаһан да буола илик элбэх турдаах астык күрэхтэһии бэрт тэрээһиннээхтик күнү быһа буолан, бары кыттааччылар хойукка диэри илин-кэлин түсүһэн, кыайыылаахтары быһаардылар. Дьахталларга 1 миэстэҕэ Мэҥэ Хаҥаластан Ольга Иванова, 2 миэстэҕэ Бороҕонтон Светлана Сивцева, 3 миэстэҕэ Тумултан Наталья Аржакова, эр дьоҥҥо 1 миэстэҕэ Тандаттан Анатолий Колодезников, 2 миэстэҕэ Суоттуттан Сергей Николаев, 3 миэстэҕэ Бороҕонтон Дмитрий Аммосов тахсаннар, туһааннаах грамоталарынан, мэтээллэринэн, сыаналаах бириистэринэн наҕараадаланнылар. Кыайыылаахтары таһынан үчүгэй таһымнаах оонньуулары Василий Сивцев, Дмитрий Павлов, Валерий Ефимов, Саргылаана Избекова, Сидор Окоемов, Иван Орлов, Семен Гоголев көрдөрдүлэр. Анал ааттары «Старейший участник турнира» - Иннокентий Бурнашев, «За верность шахматам» - Сергей Николаев, «За волю к победе» - Михаил Ушницкай сүктүлэр. Күрэхтэһии Григорий Капитонович сырдык аатын үйэтитэр сыалын- соругун толору ситтэ, турнир кыттыылаахтара күрэхтэһиини тэрийбит Григорий Капитонович кэргэнигэр, бииргэ төрөөбүттэригэр, аймахтарыгар уонна тыл көтөхпүт Никифоров Спиридон Васильевичка махтаннылар. ✍️ Михаил Ушницкай 📲Мах-каналбытыгар сурут ⬇️ https://max.ru/channel_ua_murusahargata 🌐 https://мюрюгазета.рф/ ✅ @uamurusahargata @ulusmedia