*"АЛРОСА" Сунтаар улууһун кытта бииргэ үлэлээһини күүһүрдэр: Павел Маринычев оробуочай ... — 11 июня 2026 г. в 06:56:19.522
*"АЛРОСА" Сунтаар улууһун кытта бииргэ үлэлээһини күүһүрдэр: Павел Маринычев оробуочай сырыыта* 🔹️🔹️🔹️"АЛРОСА" хампаанньа генеральнай дириэктэрэ Павел Маринычев оробуочай бөлөҕүн кытта Сунтаар улууһугар үлэлээтэ. Сырыы кэмигэр хампаанньа салайааччыта улуус социальнай-экономическай сайдыытыгар туһуламмыт хас да суолталаах эбийиэктэри көрдө уонна инники былааннары улуус активын кытта дьүүллэстэ. Үлэ бөлөҕө бастакынан Сунтаарга 2006 сыллаахха тутуллан үлэҕэ киирбит олохтоох стадиоҥҥа сырытта. Бу стадион улуус олохтоохторугар, ыччаттарыгар успуордунан дьарыктаналларыгар сүрүн эбийиэгинэн буолар. Наадалаах боппуруостары дьүүлгэһии кэмигэр, Павел Маринычев стадион трибунатын уонна сүүрэр дорожкатын саҥардыы үлэтигэр «АЛРОСА» хампаанньа күүс-көмө буоларын биллэрдэ. Хампаанньа бу үлэлэргэ наадалаах тутуу матырыйаалынан хааччыйыан сөптөөҕө бэлиэтэннэ. Бу улууска успуорт таһымын өссө үрдэтэргэ уонна олохтоохтор доруобуйаларын чэбдигирдиигэ улахан тирэҕинэн буолуоҕа. Маны тэҥэ оробуочай бөлөх тыа хаһаайыстыбатын бородууксуйатын оҥорон таһаарар «Хочо» тэрилтэ материальнай-техническэй базатын билистэ. Тэрилтэ инники былааннарыгар олохтоох оҥорон таһаарыыны күүһүрдэр сыалтан саҥа халбаһыы оҥорор сыаҕын арыйары былаанныыр. Хампаанньа бэрэстэбиитиллэрэ тыа сиригэр олохтоох бородууксуйаны таһаарар тэрилтэлэр күүһүрэр уонна кэҥиир былааннарын улаханнык сыаналаатылар уонна кинилэр оҥорон таһаарар бородууксуйаларын толору ыларга сөбүлэҥ түһэрсиэхтэрэ. Түмүккэ Павел Маринычев Сунтаар улууһун активын кытта көрсөн алмааһы хостуур баараҕай хампаанньа билиҥҥи кэмҥэ ыытаар үлэтин, ситиһиилэрин уонна инники перспективнай былааннарын сырдатта. Олохтоохтор хампаанньа үлэтин уонна улууһу кытта сибээһин туһунан интэриэһиргиир ыйытыыларыгар хоруйдары ыллылар. Бу сырыы «АЛРОСА» хампаанньа уонна Сунтаар улууһун икки ардыларыгар сыһыан өссө күүһүрэрин, ону тэҥэ хампаанньа тыа сирин социальнай эрэ буолбакка, производственнай да өттүн өйүүрүн өссө төгүл бигэргэттэ. _Сунтаар улууһун дьаһалтатын пресс-сулууспата_