*Ууга сытар ходуһалары быыһыыр туһугар: Сунтаарга субуотунньук тэриллиэҕэ* — 24 июля 2026 г. в 10:30:51.065
*Ууга сытар ходуһалары быыһыыр туһугар: Сунтаарга субуотунньук тэриллиэҕэ* 🌾🌾🌾Сунтаар улууһугар уһун унньуктаах ардахтар түһэннэр, намыһах сирдээх оттуур ходуһалар ууга бардылар. Саха киһитигэр саамай суолталаах, кыстыгы быһаарар от үлэтин кэмигэр, бу курдук, айылҕа уустук турукка киллэрдэ. Сүүнэ ходуһалар, оттоох күрүөлэр бүтүннүү уу анныгар сыталлар. Бүгүн улуус баһылыга Анатолий Григорьев, Сунтаар нэһилиэгин баһылыга Эдуард Филиппов уонна тыа хаһаайыстыбатын управлениетын тустаах үлэһиттэрэ оттуур сирдэри көрдүлэр. Кинилэр чопчу Бэрэ, Көрдүгэн, Ураһалаах уонна Ойбон Күөл ходуһаларыгар сырыттылар. Быһыы-майгы сытыырхайбыта харахха тута быраҕыллар. Тыа сирин дьоно окко киирбит эрээрилэр, сир-уот ууга сытар буолан үлэ тахсыбат туруктанна. Салалта уонна испэһэлиистэр ходуһалартан ууну хайдах ыытыахха сөптөөҕүн уонна хайысхатын быһаарар сыалтан урукку хоруулары көрдүлэр. Көрүү түмүгүнэн ууну түһэрэр сөптөөх ханаал тобулунна. Билигин тутаах соругунан ол хоруулары хаһыы, ууну ыытыы буолар. Маныаха улуус салалтата анал субуотунньук тэрийэргэ быһаарда. Күүһү түмэн, ууну түһэрдэххэ эрэ улуус отчуттара кыстык отторун хомуйар кыахтаныахтара. _Сунтаар улууһун дьаһалтатын пресс-сулууспата_