👫👭👬*ТОС- тар форумнара*👬👫👬
👫👭👬*ТОС- тар форумнара*👬👫👬 От ыйын 29 күнүттэн Сунтаар нэһилиэгин ТОС-тарын салайааччылара, активнай чилиэннэрэ Бурятия республикатын ТОС- тарын форумугар ыҥырыылаах ыалдьыт буолан кыттыыны ылар чиэскэ тиксэн, айан тутан саҕалаатыбыт. Бу форумҥа Республика граныгар "Лучший председатель" көрүҥҥэ ТОС "Сомоҕо" кыайыылаах буолан, босхо путевка ылан манна кыттарга төрүөт буолла. Сунтаар нэһилиэгин алта түөлбэтин чилиэннэрэ Оксана Матвеева, Надежда Павлова, Нюргуяна Лаптева, Нина Краскова, Иветта Софронова, Нюргустана Иванова, Ольга Данилова , Иван Васильев уонна олохтоох дьаһалта исписэлииһэ Людмила Тертюхова буолан кыттыыны ыллыбыт. Бары да Улан-Удэ сиригэр маҥнайгытын тиийбит буолан сиэр быһыытынан арыылаах алаадьынан сирбитин-уоппутун аһатан саҥа сиргэ үктэннибит. Тиийбит күммүтүгэр Саха Сирин делегацията буолан, уопсайа 27 киһи, алта улуустан түмсэн, түгэн тосхойбучча Монголия сиригэр айан туттубут. Түүн устата айаннаан Чингисхан сиригэр-уотугар үктэнэн, туох хайдах дьарыктаах, олохтоох-дьаһахтаах норуот буоларын илэ харахпытынан көрөн, сөҕүү-махтайыы буоллубут. Биһиги делегацияны Дмитрий Баишев бэйэбит уолбут, бизнесмэн, Монголия мас-тардыhыытын федерациятын бочуоттаах вице-президена, Монголия спордун уонна физическай культуратын үтүөлээх үлэhитэ, хас да тэрилтэ учредитэлэ, «Альфа Травел»Монголиятаа5ы хампаанньа генеральнай директора Милена Толстоухова уонна Сайнбаярт көрсөн Монголия историятын, кэрэ сирдэрин көрдөрөн арыаллыы сырыттылар. Киэҥ нэлэмэн сыһыы муҥунан көҥүл сылдьар сылгы-сүөһэ, бараан дэлэйэ киһи эрэ сүргэтин көтөҕөр. Улан-Батор пробкатынан сөхтөрдө, хас биир ыалга кырата үстүү массыыналаах, квартиралаах, сирдээх диэни олус сэҥээрэ истэн, ол аата сөпкө дьаһынан олорорун туоһулуур дойду эбит диэн өйдөбүлгэ кэллибит. Тиийээт монголлар да, тас дойдуттан да, кэлбит ыалдьыттар сүгүрүйэр, сөбүлээн сылдьар сирдэригэр "Черепаха" хайатыгар тиийэн, төрүт астарын юртаҕа олорон, бараан этиттэн хоргок, манна миинигэр таас уган оргутан эти кытта хоторон итиилии ыалдьыкка уунан тарбахтарын төбөтүнэн сойуор дылы илииттэн илиигэ төкүнүтэн тарбахтарга баар "туочукалары массаастыыбыт" диэн ааттыыллар эбит. Иккис аспыт хушуур диэн биһиги астыыр чебурекпытыгар майгынныыр бурдук ас буолар эбит, иһэ бараан этэ, тото аһаан баран, баҕа санааны этинэ хайаны дабайдыбыт. Тэбиэҥҥэ, акка олорсон умнуллубат түгэни бэлэхтэннибит. Ол кэннэ Чингисхаан (конная статуя), аан дойдуга соҕотох аарыма оҥоһукка тахсан бу илэ баардыы көрөн турарыгар хаартыскаҕа хатанан, историятын сэҥээрэ истэн дуоһуйдубут. Турист элбэҕэ сөхтөрдө, аан дойду араас муннугуттан кэлэн ол курдук: Германия, Китай, Япония, Корея, Англия, бэл дэтэр Саха сириттэн ыалдьыттары көрсөн Чингисхааҥҥа сүгүрүйэн, махтанан, хаартыскаланныбыт. Сарсыныгар итэҕэллээх сирдэригэр Ганданҥа сылдьан, аатырар монгольскай табаар ырыынагар тирииттэн, тэбиэн, бараан түүтүттэн тигиллибит танас-сап атыылаһан үөрүүбүт үксээн, арыаллааччыларга Дмитрийга, Миленаҕа, Сайнбаярга кылгас да кэмҥэ Улан-Батор кэрэтин, историятын сырдаппыттарыгар махтанан төттөрү Улан-Удэҕэ айаҥҥа туруннубут. Улан-Удэ- Монголия- Улан Удэ айаныттан сонуннаата Людмила Т. 05.08.26 с.