Саха сирин үс оройуонугар халаан уутуттан сылтаан ыксаллаах быһыы-майгы эрэһиимэ оннуна... — 5 августа 2026 г. в 11:02:36.495
Саха сирин үс оройуонугар халаан уутуттан сылтаан ыксаллаах быһыы-майгы эрэһиимэ оннунан хаалар Ыксаллаах быһыы-майгы эрэһиимэ Сунтаар, Үөһээ Дьааҥы уонна Томпо оройуоннарыгар салҕанар, манна сайыҥҥы халаан содулун туоратыы үлэтэ бара турар. Бу туһунан брифиҥҥэ СӨ Гражданскай көмүскэлгэ миниистир Дмитрий Лепчиков иһитиннэрдэ. Миниистир этэринэн, өрөспүүбүлүкэҕэ гидрологическай балаһыанньа сыыйа бигэтийэн эрэр. Өрүстэргэ уу таһыма намтаан иһэр, оттон эмсэҕэлээбит оройуоннарга ууга барбыт сирдэр ууттан толору босхолоннулар. «Олох-дьаһах секторыгар уонна инфраструктура эбийиэктэригэр чөлүгэр түһэрэр үлэлэр ыытыллаллар. Олорор дьиэлэри хамыыһыйанан көрүү, тахсыбыт хоромньуну ааҕыы ыытыллар», — диэн Дмитрий Лепчиков бэлиэтээтэ. Эмсэҕэлээбит нэһилиэнньэлээх пууннар олохтоохторугар гуманитарнай көмөнү, эмтэри уонна дезинфекциялыыр сириэстибэлэри тиэрдии салҕанар. Ону тэҥэ баҕа өттүнэн көмө хомуйуута бара турар. Суһал сулууспалар дааннайдарынан, эмсэҕэлээбит оройуоннарга наадалаах чох саппааһа оннунан хаалбыт. Чөлүгэр түһэрэр үлэни түргэтэтээри, эмсэҕэлээбит оройуоннарга устудьуоннар тутуу этэрээттэрин 30 байыаһын эбии ыыттылар. СӨ Бырабыыталыстыбатын Бэрэссэдээтэлин сорудаҕынан былаас уорганнарыгар чөлүгэр түһэрэр дьаһаллары бүтэриигэ, тахсыбыт хоромньуну ааҕыыга уонна эмсэҕэлээбит дьоҥҥо төлөбүрдэри кэмигэр биэрэргэ соруктар турдулар.