Саха сиригэр быыбарга кыттыы көрдөрүүтэ 2021 сыл түмүгүн куоһарбыт
Саха сиригэр быыбарга кыттыы көрдөрүүтэ 2021 сыл түмүгүн куоһарбыт Өрөспүүбүлүкэҕэ Судаарыстыбаннай Дума дьокутааттарын быыбара салҕанар. Икки күн түмүгүнэн кыттыы 35,9% буолла, ити 2021 сылга холоотоххо үрдүк. Саха сиринээҕи ЦИК көрдөрөрүнэн, куоластааһын улахан кэһиитэ суох ыытыллар. Саха сирин олохтоохторо Госдума дьокутааттарын быыбарыгар көхтөөхтүк кытталлар. Икки күн түмүгүнэн 232 800 быыбардааччы өрөспүүбүлүкэ кэскилин туһугар куолаһын биэрбит. «Үс күннээх куоластааһын бастакы күннэригэр кыттыы үрдүк көрдөрүүтүн үчүгэйдик сыаналыыбын. Уһук Илин уонна Саха сирэ быыбарга көхтөөхтүк кытталлар. Соторутааҕыта дойду бырабыыталыстыбата Уһук Илини 2036 сылга диэри сайыннарыы Стратегиятыгар илии баттаабыта. Бу докумуон инники 10 сылга макрорегион туруктаах сайдыытын көрөр. Дьон чопчу былааннарын, кэскиллэрин иһин куоластыыллар, макрорегион инники сайдыытыгар уонна дьон-сэргэ олоҕун тупсарыыга эрэллээхтэр», – диэн политолог Чокуур Гаврильев санаатын эттэ. Куоластааччы кыттыытын үрдэтиигэ үс күннээх куоластааһын эмиэ оруолу оонньоото. Бастатан туран быыбардааччыларга маннык көрүҥ табыгастааҕын кытта сибээстээх. Үс күннээх куоластааһын дойду олохтоохторугар быыбар тиийимтиэтин үрдэтэргэ уонна быыбар учаастактарыгар ноҕоруусканы аччатарга кыаҕы биэрдэ. Үгүс дьоҥҥо бу табыгастаах быһаарыы буолан таҕыста: сорохтор бээтинсэҕэ үлэ иннинэ уонна кэнниттэн куоластыыр кыахтаннылар, сорохтор субуотаҕа ордук иллэҥ кэми таларга эбэтэр учаастакка сылдьыыны өрөбүлгэ атын дьыалалары кытта холбуурга быһаарыннылар.