Алтынньы 14 күнүгэр Сунтардааҕы анал (коррекционнай) уопсай үөрэхтээһин оскуола-интэрин...
Алтынньы 14 күнүгэр Сунтардааҕы анал (коррекционнай) уопсай үөрэхтээһин оскуола-интэринээтигэр «Создание инклюзивного пространства: взаимодействие учителя и логопеда при работе с детьми с речевой задержкой» диэн тиэмэҕэ олус туһалаах уонна дириҥ ис хоһоонноох улуустааҕы семинар-практикум үрдүк таһымҥа буолан ааста. Бу тэрээһин оҕо саҥатын сайыннарыыга специалистар ситимнээх үлэлэрин хайдах салайары — ырытар сыаллаах ыытылынна. Семинар үлэтигэр улуус оскуолаларыттан барыта 68 педагог: алын кылаас учууталлара, дьиэҕэ үөрэтии педагогтара, тьютордар уонна улуус оскуолаларын логопедтара көхтөөхтүк кытыннылар. Пленарнай чаас үлэтигэр Сунтар улууһун (районун) «МОУО» ИМО сүрүн специалиhа Маргарита Иннокентьевна Попова кыттыыны ылла. Кини инклюзивнай эйгэ хас биирдии үөрэх тэрилтэтигэр наадатын, учуутал уонна логопед ситимнээх үлэтэ оҕо тылын-өһүн сайыннарыыга улахан суолталааҕын бэлиэтээтэ. Салгыы оскуола директора Анисия Семеновна Игнатьева “Оскуола уонна дьиэ кэргэн ураты оҕону иитиигэ” диэн дакылаатыгар ураты сайдыылаах оҕону иитиигэ, үөрэтиигэ сөптөөх хайысханы тутуһуу уонна дьиэ кэргэни кытта ыкса сибээстээхтик үлэлиир туһунан кэпсээтэ. Үөрэх чааһын салайааччыта Марфа Петровна Федорова “Работа школьного психолого-педагогического консилиума в условиях коррекционной школы” диэн тиэмэни ырытан, анал оскуола усулуобуйатыгар психолого-педагогическай консилиум хайдах үлэлиирин, нормативнай-организационнай өттүн билиһиннэрдэ. Алын кылаас учуутала Луизия Октябриновна Матросова бэйэтин үлэтин уопутуттан “Ааҕыы үөрүйэхтэрин иҥэрии” диэн тиэмэни сырдатан, оҕо ааҕар дьоҕурун уһугуннарар ньымаларын үллэһиннэ. Мустубут ыалдьыттар дууһаларын кылын тарыйбыт, оскуола оҕолорун ырыалара тэрээһин саамай истиҥ түгэнинэн буоллулар. Семинар практическай чааһа олус көдьүүстээх буолла. Мустубут педагогтар уруоктары, маастар-кылаастары көрдүлэр. Ол курдук учууталлар бэйэ-бэйэлэрин кытта хайдах сибээстэһэн, оҕо тылын-өһүн сайыннарар ньымаларын көрдөрбүттэрэ элбэх киһини интэриэһиргэттэ. Семинар түмүгэ дискуссионнай площадкаҕа санаа үллэстиитинэн, ону тэҥэ тэрээһин кэмигэр ыытыллыбыт лотереянан уонна быыстапка-атыынан олус көхтөөхтүк уонна истиҥник түмүктэннэ. Педагогтар бэйэлэрин билиилэрин байытынан, үлэҕэ туттуллар саҥа ньымалары ылынан, махтанан тарҕастылар.