Үс күннээх күргүөмнээх үлэ түмүгүнэн өр күүппүт Леснойбут муостатын өрөмүөнэ оҥоһулунна...
Үс күннээх күргүөмнээх үлэ түмүгүнэн өр күүппүт Леснойбут муостатын өрөмүөнэ оҥоһулунна. Сүүрбэттэн тахса сыл өрөмүөнэ суох турда, кэнники сылларга сааскы муус тутан турбут бетон тирэҕин хамсатан дьоҥҥо-сэргэҕэ , сүөһүгэ улахан кутталы үөскэтэн турбута. Ону ол диэбэккэ атын суол суох буолан кыһалҕаттан күһэллэн үлэҕэ , үөрэххэ, сааскы өттүгэр балыкка, сайын сөтүөлүүр сиргэ, күһүн сир аһыгар туораан сылдьыбыттара. Бу сыл хаамтахха хамсыыра өссө улаатан сабыллан тура сылдьыбыта, дьон долгуйара улаатан куйаар ситимигэр санааларын эппиттэрэ. Сайынтан ыла олохтоох дьаһалта улуус , түөлбэ депутаттарын, техникалаах тэрилтэ салайааччыларын уонна түөлбэ активын кытта кэпсэтиилэр буолбуттарын түмүгүнэн бу күһүнү аһардыбакка туораттан көмө көрдөөбөккө бэйэ күүһүнэн өрөмүөн оҥоруохха диэн быһаарсыы буолбута . Ол курдук алтынньы ыйга диэн болдьоммута. Бээтинсэттэн үлэ көхтөөхтүк саҕаламмыта. айылҕабыт да анаан-минээн туран биэрдэ, бу үс күн ибир да былыта суох, тыал-куус да түспэтэ, чуумпуран иһийэн туран биэрдэ. ТОС активын аатыттан уонна тус бэйэм ааппыттан махтаныахпын баҕарабын Сунтаарбыт нэһилиэгин баһылыгар Эдуард Егоровичка, Главстройкомплекс, "Сунтаратодор", ЖКС, "Абаҕа" КСК, Водоканал, НАТК "Партизан", биирдиилээн урбаанньыттарга, олохтоох уолаттарга уонна итии аһылык тэрийэргэ күүскэ көмөлөспүт түөлбэ көхтөөх олохтооҕор Мария Поповаҕа, ынаҕын минньигэс этиттэн бэрсибит Евдокия Егоровнаҕа, бурдук аһылык буһаран, күөрчэх ытыйан күндүлээбит ытык саастаах Галина Махметулловнаҕа, минньигэс алаадьылаах Парасковья Егоровнаҕа, Маргарита Евсееваҕа, туустаах тэллэйдээх, саһарчы буспут бирэскиилээх Александра Ивановаҕа. Ити курдук өрөбүлү аахсыбакка, дьон кыһалҕатын өйдөөн өрө күүрүүлээхтик үлэлээтилэр. Манна даҕатан туспа махталбыт ананар түөлбэ депутатыгар Александр Федоровка уонна улуус депутатыгар Игнат Яковлевка. Кинилэр салайан, сааһылаан, сөптөөхтүк дьаһанан үлэ таһаарыылаах буолла. Инникитин даҕаны баар кыһалҕаларга түмсүүлээх буолуохпут диэн эрэнэбит. ТОС Абаҕа сал.Оксана Матвеева