Самаан сайын салаллыыта Сунтаар 3 №-дээх орто оскуолата Олоҥхо уораҕайыгар "Дьоллоох оҕ... — 27 мая 2026 г. в 01:12:31.604
Самаан сайын салаллыыта Сунтаар 3 №-дээх орто оскуолата Олоҥхо уораҕайыгар "Дьоллоох оҕо саас түһүлгэтэ" диэн отчуот-концера буолла. Үөрэнээччилэр оскуола гимн-ырыатын толоруутунан, тоҕус мэҥэ хамсаныынан, алгыстаах алаадьынан, саамал кымыһынан ыалдьыттары айах тутан саҕаланна. Оскуола директора А.Н.Николаев оскуола үлэтин-хамнаһын сиһилии билиһиннэрдэ. Оскуолабыт быйылгы үөрэх дьылыгар химия буолатын территориятыгар көһөрүллэн, саҥа тыыннанан үлэлэлээбитэ 35 сыллаах үбүлүөйүн көрсөөрү бэлэмнэнэр. Онно анаан "Үбүлүөйдээх сыл бастыҥ үөрэнээччитэ" анал аат иҥэрилиннэ: алын сүһүөххэ - Сидорова Мичийэ-Куоҕа (3 кылаас), орто сүһүөххэ - Слепцов Айгылаҥҥа (7 кылаас), үрдүк сүһүөххэ - Сергучев Михаилга (10 кылаас). "35 туйгун сыана" анал ааты ситистилэр: Егорова Кристина 4 кылаас, Слепцов Айгылан 7 кылаас, Слепцов Дьолун 10 кылаас үөрэнээччилэрэ. Чиэстэннилэр: билии кыһатын туйгун, бастыҥ үөрэнээччилэрэ, НПК, араас таһымнаах олимипиада кыайыылаахтара, призёрдара, тустуук, боксер, сүүрүк, мас тардыһыык ситиһиилээх спортсменнар. Концерт бииртэн биир чаҕылхай нүөмэрдээх буолла. Республиканскай араас күрэх номинаннара, кыайыылаахтара "Пульс" (сал. Н.А.Чжан), уонна "Түһүлгэ" (сал. Лазаревтар) норуодунай үҥкүү бөлөҕүн солбуллубат кыттааччылара Дьулус Васильев уонна Сайнаара Саввинова үҥкүү абылаҥар уйдардылар. Аныгы оҕону сахалыы тыыннныыр, саха фольклорун эйгэтигэр уһуйар "Эйгэ" (сал.Алексеева Т.А) бөлөх олоҥхолоон саататта, тойуктаан доллоһутутта, чабырҕахтаан чыбыгыратта, хомустаан дьүрүһүттэ, Дайаана Жиркова (2 кылаас) "Туллукчаан" ырыата киһи сүрэҕин-быарын ортотунан киирдэ. "Үтүө Күбэй" оскуола КВН хамаандата (сал.Васильев С.С.) араас минитюралары көрдөрөн күллэртээтэ. "Буойун Хомус" (сценарий Иванова С.М.) видеоролик көстөн уйадытта. Быйыл Сунтаарбыт 225 сылын туолар, онно анаан "Сунтаар туһунан номох" сценка дойдубут тоҕо Сунтаар диэн ааттаммытын сиһилии кэпсээтэ. Учууталлар үөрэнээччилэринээн: Семен Семенович Васильев Дьулустуун "Эдэр киһи", Павел Александрович Павлов Арчыллыын "Бэлэхтээ", Галина Андреевна Иванов Валералыын хомус доҕуһуолунан норуот ырыата, спортсмен уолаттар " Айаннаа", учуутал кыргыттар "Дьол" ырыаларын дуоһуйа иһиттибит. Ыам ыйын 26 күнүгэр алгыстаах чуораан оскуоланы бүтэрээччилэр бүтэһигин чугдаарда. Оскуолабытын 17 үөрэнээччи түмүктээри долгуйа сылдьар. Кылаас салайааччыта РФ үөрэҕириитин бочуоттаах үлэһитэ, СӨ үөрэҕириитин туйгуна Николаева Ангелина Николаевна. Выпускниктар ийэлэринээн аҕаларынаан, эдьиийдэрин, убайдарын, учууталларын кытта аныгылыы флеш-моб үҥкүүлээн сэргэхситтилэр. Кылаас салайааччылара кылаастарын үлэтин туһунан хаартысканан көрдөрдүлэр. Оскуола тарбахтарыгар талааннаах учууталлара Прасковья Петровна уонна Диана Радж төрөппүттэр, үөрэнээччилэр, учууталлар оҥоһуктарын, уруһуйдарын быыстапкатын туруоран биһирэннилэр. Бу курдук оскуола коллектива бары түмсэн отчуот-концерпыт үрдүк таһымҥа ыытылынна. Көрөөччүлэрбитигэр ытыс дохсун тыаскытыгар, истиҥ сыһыаҥҥытыгар махтанабыт! Анна Алексеева