Убаастабыллаах Алена Романовна, Сунтаар улууһун Архыыбын үлэһиттэрэ уонна бэтэрээннэрэ! — 5 мая 2026 г. в 11:49:45.828
Убаастабыллаах Алена Романовна, Сунтаар улууһун Архыыбын үлэһиттэрэ уонна бэтэрээннэрэ! Сунтаар улууһа (оройуона) муниципальнай оройуон дьаһалтатын, оройуон дьокутааттарын Сэбиэтин уонна тус бэйэбит ааппытыттан эһигини Сунтаар улууһун Архыыбын тэриллибитэ 90 сылынан - улахан үбүлүөйүнэн ис сүрэхпититтэн итиитик-истиҥник эҕэрдэлиибит! 90 сыл - бу улуус устуоруйатын, кини хас биирдии олохтооҕун олоҕун кэрэһилиир улахан кэрчик кэм. Архыып - норуот кэриэһэ, устуоруйа кырдьыктаах кэпсээнньитэ, бу биһиги өбүгэлэрбит хаалларбыт суруктарын, ахтыыларын, араас матырыйаалларын кэнчээри ыччакка тиэрдэр суол. Кини биһиги улууспут ааспыт кэмин, бүгүҥҥү күнүн уонна инники кэскилин бигэ ситимниир тирэх буолар. Биһиги бу күҥҥэ улуус Архыыбын сайдыытыгар сүҥкэн кылааттарын киллэрбит урукку салайааччыларбытын, чулуу дьоммутун ахтан-санаан ааһабыт. Степанова Людмила Петровна 15 сыл үлэлиир кэмигэр архыып үлэтин бэрээдэгин сааһылаабыта. Кини кэнниттэн сэбиэдиссэйинэн Яковлев Аркадий Егорович олус айымньылаахтык үлэлээн, элбэх историческай даталары чуолкайдаабыта. Ол курдук Сунтаар улууһун сурукка киирбит сылын чуолкайдаан, билигин Сунтаар улууһун күнэ диэн бэлиэтэнэр күммүтүн олохтообута. Энтузиаст кыраайы үөрэтээччи буолан, дойду, өрөспүүбүлүкэ архыыптарын кэрийэн, элбэх архивнай докумуоннары булбута, дааннайдары чуолкайдаабыта, архыып докумуоннарыгар олоҕуран улуус устуоруйатын сааһылаабыта. Ону таһынан элбэх дьоҥҥо төрүччүлэрин оҥостоллоругар, төрдүлэрин-уустарын булалларыгар көмөлөспүтэ. Кини хаалларбыт баай духуобунай нэһилиэстибэтэ улахан историческай суолталаах. Күндү улуус Архыыбын үлэһиттэрэ уонна бэтэрээннэрэ! Бу үбүлүөйдээх күҥҥэ эһиэхэ барыгытыгар уонна дьиэ кэргэҥҥитигэр чэгиэн доруобуйаны, үлэҕитигэр саҥа ситиһиилэри, дьолу-соргуну, эйэлээх олоҕу баҕарабыт! Сунтаар улууһун баһылыга А.В. Григорьев Улуус дьокутааттарын Сэбиэтин бэрэссэдээтэлэ У.Д. Попова