*Эрчимнээх саас күрэҕэ: Бүлүү бөлөх бэтэрээннэрэ спорт түһүлгэтигэр түмсэллэр* — 6 июня 2026 г. в 01:29:32.775
*Эрчимнээх саас күрэҕэ: Бүлүү бөлөх бэтэрээннэрэ спорт түһүлгэтигэр түмсэллэр* 🔹️🔹️🔹️Бүлүү бөлөх улуустарын эрчимнээх, кыайыыга дьулуурдаах бэтэрээннэрин үбүлүөйдээх спартакиадата саҕаланна. Быйыл 10-с төгүлүн тэриллэр улахан спорт түһүлгэтэ туспа ураты суолталаах. Спартакиада Бүлүү улууһугар өр сылларга таһаарыылаахтык үлэлээбит, бу хамсааһын төрүттэнэригэр уонна сайдарыгар сүҥкэн кылаатын киллэрбит Герасим Солтуев сырдык аатыгар ананна. Үбүлүөйдээх күрэхтэһиигэ Бүлүү бөлөҕүн 4 улууһуттан уопсайа 173 спортсмен кыттыыны ылла. Кинилэр хас биирдиилэрэ эдэр көлүөнэҕэ чөл олох, күүстээх санаа уонна хамсаныы уостубат күүһүн көрдөрөр дьиҥнээх холобурунан буолаллар. Кинилэр барыта 13 олус интэриэһинэй, сымса буолууну уонна өй-санаа күүһүн эрэйэр спорт көрүҥнэригэр күрэхтэһиэхтэрэ. Спартакиада арыллыытын үөрүүлээх чааһыгар Сунтаар улууһун баһылыга Анатолий Григорьев кыттааччылары ис сүрэҕиттэн эҕэрдэлээтэ. Кини бэтэрээннэр спорка уонна уопсастыбаннай олоххо көхтөөх позицияларын үрдүктүк сыаналаата, барыларыгар ситиһиилэри уонна саҥа кыайыылары баҕарда. Түгэнинэн туһанан, улууска спорт сайдыытыгар тус кылааттарын киллэрбит бастыҥ бэтэрээннэргэ бочуоттаах бэлиэлэри уонна наҕараадалары үөрүүлээх быһыыга-майгыга туттарда. Бу күрэхтэһии бары кыттааччыларга саҥа күүһү-уоҕу, доҕордоһуу сылаас тыынын уонна умнуллубат түгэннэри бэлэхтиир. Үтүө дьоммут инникитин да саҥа чыпчааллары дабайарга бэлэмнэрин туоһулуур. _Сунтаар улууһун дьаһалтатын пресс-сулууспата_