*Үтүө холобур буолар ыаллар чиэстэннилэр* — 8 июля 2026 г. в 04:48:18.233
*Үтүө холобур буолар ыаллар чиэстэннилэр* 🕊🕊🕊Дьиэ кэргэн күнүгэр улуус дьаһалтатыгар ураты истиҥ, иһирэх уонна дириҥ суолталаах тэрээһин буолла. Ол курдук, олоххо үтүө холобуру көрдөрөр, урууну-оҕону тэнитэн улуус сайдыытыгар бэйэлэрин кылааттарын киллэрбит аҕа саастаах дьиэ кэргэттэри чиэстээтилэр. Улуус баһылыгын социальнай боппуруостарга уонна имиджевай политикаҕа солбуйааччы Мирослав Иванов мустубут ыалдьыттары ис сүрэҕиттэн эҕэрдэлээтэ. Кини дьиэ кэргэн хас биирдии киһиэхэ уонна уопсастыбаҕа тирэх буолар улахан күүстээҕин бэлиэтээтэ. Үөрүүлээх быһыыга-майгыга өр сылларга бииргэ олорбут, оҕо иитэн, сиэннэнэн улууска ытыктанар мааны ыалларга "Таптал уонна бэриниилээх буолуу иһин" түөскэ кэтэр улахан суолталаах мэтээллэр туттарылыннылар: Сиэйэттэн Октябрина Прокопьевна уонна Алексей Михайлович Максимовтар. Күндэйэттэн Любовь Семеновна уонна Геннадий Михайлович Львовтар. Сунтаартан Антонина Николаевна уонна Василий Васильевич Давыдовтар. Бу үрдүк наҕарааданы ылбыт дьиэ кэргэттэр бары 35 сылтан үөһэ бииргэ олорон, олох араас кыһалҕаларын уонна үөрүүлэрин тэҥҥэ үллэстэн кэлбит дьон буолаллар. Кинилэр уопуттара, бэриниилээх тапталлара уонна ыал буолан олоруу үрдүк култуурата эдэр көлүөнэҕэ холобурунан буолар. _Сунтаар улууһун дьаһалтатын пресс-сулууспата_