*Дьокуускай куорат киин сиригэр Арассыыйа Дьоруойа Дмитрий Егоров - Сунтаар уонна кини ...
*Дьокуускай куорат киин сиригэр Арассыыйа Дьоруойа Дмитрий Егоров - Сунтаар уонна кини бойобуой доҕоро Николай Романов - Ронин хорсун ааттарын үйэтитэр пааматынньык истиҥ-иһирэх түгэҥҥэ аһылынна* 🪖💐Сэрии хонуутугар бэйэ-бэйэлэригэр эрэнсэн, тиһэх мүнүүтэҕэ диэри эр санаалаахтык киирсэн, өлбөөдүйбэт үйэлээх өйдөбүнньүгү хаалларбыт уолаттар пааматынньыктарын аатырбыт саха скульптора Николай Чочасов чочуйан оҥордо. Монумент үрүҥ сабыытын дьон-сэргэ иннигэр арыйар үрдүк чиэс Дмитрий Егоров аҕатыгар Николай Алексеевичка уонна Николай Романов тапталлаах кэргэнигэр Яна Романоваҕа бэрилиннэ. Сүрэх сылааһын уурбут бу түгэн мустубут дьону барыларын долгутта. Бу өйдөбүнньүк бэлиэ олоххо киирэригэр Сунтаар улууһун дьаһалтататыттан 1 мөл. солк. көрүллүбүтэ. Маны сэргэ улахан кылааттарын киллэрбит, күүс-көмө буолбут дьонунан тутуу тэрилтэлээх урбаанньыттар Василий Шамаев уонна Николай Варламов буолаллар. Кинилэр бу үтүө дьыалалара патриотизм уонна доҕордоһуу холобурунан буолла. Үлэ хаамыытын хонтуруолласпыт, тиһэҕэр тиийэригэр көмө буолбут Сунтаар улууһун дьаһалтатын бэрэстэбиитэлэ Семен Глухаревка махтанабыт. Тэрээһин биир долгутуулаах түгэнинэн уолаттары кытта сэрии хонуутугар бииргэ киирсибит, хара маҥнайгыттан тиһэх күннэригэр диэри бииргэ сылдьыбыт бойобуой доҕотторо - «Стрела» уонна «Фил» позывнойдаах анал байыаннай дьайыы байыастара кыттыыны ыллылар. Кинилэр кэлбит дьоҥҥо уолаттар тустарынан истиҥ санааларын үллэһиннилэр. Бу пааматынньык сулууспалыы сылдьар уонна дойду көмүскэлигэр олохторун толук уурбут саха уолаттарын эрэллээх доҕордоһууларын бэлиэтэ буолан, өр сылларга куорат киинин киэргэтиэ уонна кэлэр көлүөнэҕэ холобур буолуоҕа. _Сунтаар улууһун дьаһалтатын пресс-сулууспата_