*К.Е. Иванов аатынан Сунтаардааҕы 3-с нүөмэрдээх оскуола төрүттэммитэ 35 сыллаах үбүлүө...
*К.Е. Иванов аатынан Сунтаардааҕы 3-с нүөмэрдээх оскуола төрүттэммитэ 35 сыллаах үбүлүөйүн үрдүк таһымҥа бэлиэтээтэ* 🔹️🔹️🔹️ Саха Республикатын биллэр бэлиитигэ уонна судаарыстыбаннай диэйэтэлэ Климент Егорович Иванов аатын сүгэр Сунтаардааҕы 3-с нүөмэрдээх орто оскуола төрүттэммитэ 35 сыллаах үбүлүөйүн бэлиэтиир үөрүүлээх тэрээһин үрдүк таһымҥа ыытылынна. Норуот айымньытын киинигэр оскуола бэтэрээн үлэһиттэрэ, билиҥҥи педагогическай коллектив, үөрэнээччилэр уонна араас сылларга үөрэммит выпускниктар тоҕуоруһа муһуннулар. 1991 сыллаахха олохтоммут үөрэх кыһата бэйэтигэр ураты хайысханы ылынан, 2006 сылтан саҕалаан олимпийскай эрэллэри бэлэмниир спорт оскуолатын үөрэҕи биэрэр салаатын быһыытынан ситиһиилээхтик үлэлиир. Бу кэм тухары үөрэх тэрилтэтэ Сунтаар улууһун аатын республика, Россия уонна аан дойду таһымнаах спорт түһүлгэтигэр дорҕоонноохтук ааттатар чулуу спортсменнары иитэн-кынаттаан таһаарбыта. Билиҥҥи кэмҥэ оскуоланы дириэктэр Андрей Николаев салайан олорор, кини салалтатынан үөрэх таһымын үрдэтиигэ, төрөөбүт тылы харыстааһыҥҥа уонна оҕону уопсастыбаннай олоххо иитиигэ күүстээх үлэ барар. Үбүлүөйдээх сылынан үөрэх тэрилтэтин коллективын Сунтаар улууһун баһылыга Анатолий Григорьев бэйэтин эҕэрдэ тылынан уруйдаата. Кини бэлиэ тэрээһин чэрчитинэн улуус итиэннэ республика үөрэҕириитин сайдыытыгар биллэр кылааттарын киллэрбит бастыҥ үлэлээх учууталларга, иитээччилэргэ Саха Республикатын таһымнаах үрдүк наҕараадалары, бочуоттаах грамоталары уонна анал бэлиэлэри үөрүүлээх быһыыга-майгыга туттарда. Оскуола коллектива 35 сыллаах үбүлүөйүн үрдүк ситиһиилээхтик көрсөн, инникитин да үөрэх уонна успуорт таһымын өссө үрдүктүк тутар былааннаах уонна сайдар соруктаах үлэлиир. _Сунтаар улууһун дьаһалтатын пресс-сулууспата_