*Сунтаар улууһун бэтэринээрнэй сулууспата: 95 сыллаах үбүлүөй уонна үйэтитиллибит устуо...
*Сунтаар улууһун бэтэринээрнэй сулууспата: 95 сыллаах үбүлүөй уонна үйэтитиллибит устуоруйа* 🔹️🔹️🔹️Сунтаар улууһугар бэтэринээрнэй сулууспа тэриллибитэ 95 сыллаах үбүлүөйүн бэлиэтиир тэрээһиннэр үрдүк таһымнаахтык ыытылыннылар. Сүүс сыллаах бэлиэ даатаҕа чугаһаабыт уопуттаах сулууспа бу үбүлүөйүн бэйэтин кыаҕынан уонна үлэһиттэрин көҕүлээһиннэринэн тэрилиннэ. Сулууспа билиҥҥи кэлэктиибэ төрөөбүт тэрилтэлэрин устуоруйатын үйэтитэр сыалтан улахан уонна суолталаах үлэни ыытта. Күннээҕи хамнастарынан үп хомунан, анал стелла оҥорон туруордулар. Бу пааматынньыкка бэтэринээрнэй сулууспа хара төрүттэниэҕиттэн улуус нэһилиэктэригэр үлэлээн ааспыт бары исписэлиистэр, бэтэринээрдэр уонна үлэ бэтэрээннэрин ааттара тиһилиннэ. Бу хас биирдии үлэһит сыралаах үлэтигэр дириҥ ытыктабыл уонна махтаныы бэлиэтинэн буолар. Үбүлүөйдээх сыл өссө биир ураты түгэнинэн урукку кэми санатар, сулууспа сайдыытын кэпсиир музей хоһун арыллыыта буолла. Музей экспозициятыгар урукку кэмҥэ туттуллубут лабораторнай тэриллэр, бэтэринээр быраастар тус маллара, ону тэҥэ устуоруйа кэрэһитэ буолар сэдэх музейнай препараттар уонна докумуоннар харалыннылар. Аны биэс сылынан улуус бэтэринээрдэрэ бэйэлэрин сүүс сыллаах өрөгөйдөөх үбүлүөйдэрин үрдүк ситиһиилээхтик көрсөр былааннаахтар. Сунтаар улууһун дьаһалтатын аатыттан бэтэринээрнэй сулууспа бары үлэһиттэрин уонна бэтэрээннэрин ис сүрэхтэн эҕэрдэлиибит. Эһиги күннээҕи бүппэт түбүктээх, тыа хаһаайыстыбатын туруктаах буолуутун хааччыйар сыралаах үлэҕит улууспут сайдыытыгар улахан тирэҕинэн буолар. Үлэҕитигэр өссө үрдүк ситиһиилэри баҕарабыт! _Сунтаар улууһун дьаһалтатын пресс-сулууспата_