*Сунтаарга ийэлэргэ аналлаах «Күһүҥҥү күн дьаралыга» бэрт сэргэх тэрээһин ыытылынна*
*Сунтаарга ийэлэргэ аналлаах «Күһүҥҥү күн дьаралыга» бэрт сэргэх тэрээһин ыытылынна* 🍂Бу күн улууспут истиҥ ийэлэрэ, ол иһигэр анал байыаннай дьайыы байыастарын ийэлэрэ уонна кэргэттэрэ мустан, күннээҕи түбүктэн арахсан, дууһалыын сынньаннылар, элбэх саҥаны уонна туһалааҕы биллилэр. Тэрээһини улуустааҕы дьахтар Сэбиэтэ үрдүк таһымнахтык тэрийэн ыытта. Ийэлэр бэйэлэрин араас эйгэҕэ холонон көрдүлэр, ол курдук сэргэх маастар-кылаастар ыытылыннылар: 🎨Уруһуй уруога - хас биирдии киһи бэйэтин ис дууһатын кырааска көмөтүнэн кумааҕыга түһэрдэ. Уоскулаҥы, налыйыыны ыллыбыт дииллэр. 🪬Ыраастаныы сиэрэ-туома - өбүгэ саҕаттан кэлбит үгэһинэн арчыланан, күүс-уох ыллылар, сиэри-туому толоруу ньымаларыгар үөрэннилэр. 💃Бачата үҥкүүтэ - кэрэ аҥардар нарын хамсаныыларынан уонна күүстээх ритмнэринэн күүһү-уоҕу эбиннилэр. Санааны чэпчэтэр, уоскутар бэрт хамсаныы эбит диэн сыаналаатылар. 🌿Сунтаар үүнээйилэрин туһаныы - төрөөбүт дойдубут сирин эмтээх отторун, үүнээйилэрин хайдах сөпкө туһанар туһунан туһалаах сүбэлэри иһиттилэр. Маны тэҥэ, саамай сүрүнэ АБДь кыттыылаахтарын дьиэ кэргэттэригэр судаарыстыбаттан туох өйдөбүл, ханнык быраап уонна көмө баарын сиһилии кэпсээтилэр. Кэлбит ыалдьыттар бэйэлэрин интэриэһиргэтэр ыйытыыларыгар тута хоруйдары, туһалаах сүбэ-ама ылан, күүстээх көмүскэллээх буолалларын өйдөөтүлэр. Сунтаар улууһун баһылыга Анатолий Григорьев аатыттан анал байыаннай дьайыы кыттыылаахтарын дьиэ кэргэттэрин кытта утумнаахтык үлэлии сылдьар «Женсовет» көхтөөх кыттыылаахтарыгар махтал суруктар туттарылыннылар. Бу курдук истиҥ уонна туһалаах тэрээһин ийэлэрбитигэр ураты күнү бэлэхтээтэ. Тэрийээччилэргэ улуус дьаһалтатын аатыттан махтанабыт!!! ✍️Сунтаар улууһун дьаһалтатын пресс-сулууспата