*Сунтаарга олохтоох көҕүлээһини өйүүр программанан «Сардаана» уһуйааҥҥа оҕону сайыннара...
*Сунтаарга олохтоох көҕүлээһини өйүүр программанан «Сардаана» уһуйааҥҥа оҕону сайыннарар эйгэ арылынна* 🔹️🔹️🔹️Сунтаар улууһугар олохтоох көҕүлээһини өйүүр программа (ППМИ) чэрчитинэн олоххо киирбит үс кыайыылаах бырайыактан биирдэстэрэ - «Сардаана» уһуйааныгар оҕону эргиччи сайыннарар табыгастаах эйгэ баар буолла. Бу бырайыак олоххо киириитин түмүгэр, уһуйааҥҥа оҕо саҥарар саҥатын, толкуйдуур дьоҕурун уонна бытархай моторикатын сайыннарар аныгы анал оборудованиелар турдулар. Улуус үрдүнэн оскуола иннинээҕи саастаах оҕолору көрөр-истэр 30-тан тахса тэрилтэ баар. Оттон «Сардаана» уһуйаан оҕо доруобуйатын чэбдигирдэр сыаллаах үлэлиир соҕотох анал хайысхалаах тэрилтэнэн буолар. Сайыннарар эйгэ арыллыытын үөрүүлээх тэрээһинигэр Сунтаар улууһун баһылыга Анатолий Григорьев кыттыыны ылла. Кини кэнчээри ыччат чэгиэн-чэбдик буоларын туһугар түмсүүлээх үлэ ураты суолтатын бэлиэтээтэ: «Кэнчээри ыччаппыт чэгиэн-чэбдик буоларын туһугар бары биир сомоҕо буолан үлэлээтэхпитинэ эрэ ситиһиилээх буолуохпут», - диэн улуус баһылыга эттэ. Билиҥҥи дьалхааннаах кэмҥэ, хомойуох иһин, доруобуйаларыгар хааччахтаах оҕолор элбэхтэр. Онон бу курдук ураты усулуобуйаны эрэйэр оҕолор тустарыгар олус айымньылаахтык үлэлиир тэрилтэҕэ үрдүк ситиһиилэри баҕарабыт. ✍️Сунтаар улууһун дьаһалтатын пресс-сулууспата