*Сунтаарга Норуоттар сомоҕолоһууларын күнүн үрдүк таһымнаахтык бэлиэтээтилэр*
*Сунтаарга Норуоттар сомоҕолоһууларын күнүн үрдүк таһымнаахтык бэлиэтээтилэр* 🔹️🔹️🔹️Сунтаар улууһугар Норуоттар сомоҕолоһууларын өрөгөйдөөх күнэ саха норуотун сиэрдээх үҥкүүтүнэн - сири-дойдуну, күнү уруйдуур үрдүк аналлаах оһуохайынан саҕаланна. Кэлбит ыалдьыттар, олохтоохтор бары илии-илииттэн сиэттиһэн, биир сомоҕо буолан оһуохай дуораанын таһаардылар. Ол кэннэ саалаҕа мустубут толору дьон оскуола оҕолорун талба таланнарын көрдүлэр. Кинилэр араас омук таҥаһын-сабын кэтэн, эйэни, доҕордоһууну уруйдуур ырыаларынан, үҥкүүлэринэн көрөөччүлэр сүргэлэрин көтөхтүлэр, кэрэхсэбиллэрин ыллылар. Бу күн үөрүүлээх чааһыгар улуус баһылыга Анатолий Григорьев мустубут дьоҥҥо эҕэрдэ тыл эттэ уонна Бойобуой албан аат күнүнэн сиэттэрэн, дойду көмүскэлигэр сылдьар хорсун биир дойдулаахтарбытын чиэстээтэ. Анал байыаннай дьайыы кыттыылааҕар Сергей Яныкка үрдүк наҕараада - "Эр санааланыы" уордьана (Орден Мужества) туттарылынна. Хас биирдии көрөөччү хорсун байыаһы сүһүөхтэригэр туран, уруйдуу-айхаллыы чиэстээтилэр. Маны тэҥэ, Кыайыы туһугар сырдык тыыннарын толук уурбут дьоруой байыастарбыт Николай Григорьев, Николай Иванов, Сергей Маганныров, Федор Попов, Василий Лаптев сырдык ааттарыгар бэриллибит судаарыстыбаннай наҕараадаларын кинилэр чугас дьонноругар, төрөппүттэригэр уонна кэргэттэригэр улахан ытыктабылы кытта туттардылар. Ону тэҥэ Эдуард Филиппов Луганскай норуодунай республикатын 2-с истиэпэннээх уордьанынан наҕараадаланна. Сэрии толоонугар сырдык тыыннара быстыбыт Дьоруой уолаттар аҕалара үрдүк сыанаҕа тахсан уолаттарын чиэстээбит түгэннэрэ хас биирдии киһи уйулҕатын хамсатта, киэн туттуу уонна кутурҕан иэйиитин үөскэттэ. "Устуоруйата суох норуот суох" диэн дириҥ ис хоһоонноох тылларынан сиэттэрэн, Сунтаар улууһун сайдыытыгар, эдэр көлүөнэни иитиигэ өҥөлөрүн иһин улуус бочуоттаах олохтоохторун ааттара ааттанна. Сунтаар улууһун Бочуоттаах олохтооҕо бэлиэнэн спорт уонна үөрэх эйгэтин үтүөлээх бэтэрээнэ Игорь Максимов наҕараадаланна. Ону тэҥэ өр сыллаах үлэтин, үтүөтүн бэлиэтээн Николай Васильевка «Бочуоттаах бэтэрээн» үрдүк аат иҥэрилиннэ. Бу тэрээһин Сунтаар сирин дьоно-сэргэтэ хаһан да бэриммэт күүстээх санаалааҕын, биир сомоҕо буолан дойду туһугар туруулаһарын уонна бэйэтин устуоруйатын, дьоруойдарын ытыктыырын өссө төгүл бигэргэттэ. ✍️Сунтаар улууһун дьаһалтатын пресс-сулууспата