Евангелие от Марка
Евангелие от Марка Мк.10:46-52 И приидо́ша во Иерихо́н. И исходя́щу Ему́ от Иерихо́на, учеником его и наро́ду мно́гу, сын Тиме́ов Варти́мей слепы́й седя́ше при пути́, прося́. И слы́шав, я́ко Иису́с Назоряни́н есть, нача́т зва́ти и глаго́лати: Сы́не Дави́дов Иису́се поми́луй мя. И преща́ху ему́ мно́зи, да умолчи́т. Он же мно́жае па́че зва́ше: Сы́не Дави́дов, поми́луй мя. И став Иису́с, рече́ его́ возгласи́ти. И возгласи́ша слепца́, глаго́люще ему́: дерза́й, воста́ни, зове́т тя. Он же отве́рг ри́зы своя́, воста́в прии́де ко Иису́сови. И отвеща́в глаго́ла ему́ Иису́с: что хо́щеши, да сотворю́ Тебе́? Слепы́й же глаго́ла Ему́: Учи́телю, да прозрю́. Иису́с же рече́ ему́: иди́, ве́ра твоя́ спасе́ тя. И а́бие прозре́ и по Иису́се и́де в путь.