Евангелие от Матфея
Евангелие от Матфея Мф.17:24–18:4 (зач. 73). Прише́дшим же им в Капернау́м, приступи́ша прие́млющии дидра́хма {Две драхмы — определенная дань на храм.}к Петро́ви и ре́ша: Учи́тель ваш не даст ли дидра́хма? Глаго́ля: ей. И егда́ вни́де в дом, предвари́ его́ Иису́с, глаго́ля: что ти мни́тся, Си́моне? Ца́рие зе́мстии от ки́их прие́млют да́ни или́ кинсо́н? {Цари земные с кого берут пошлины или подати?}От свои́х ли сыно́в, или́ от чужи́х? Глаго́ла Ему́ Петр: от чужи́х. Рече́ ему́ Иису́с: у́бо свобо́дни суть сы́нове. Но да не соблазни́м их, шед на мо́ре, ве́рзи у́дицу, и ю́же пре́жде и́меши ры́бу, возми́, и отве́рз уста́ ей, обря́щеши стати́р, {Четыре драхмы.}той взем даждь им за Мя и за ся. В той час приступи́ша ученицы́ ко Иису́су, глаго́люще: кто у́бо бо́лий есть в Ца́рствии Небе́снем? И призва́в Иису́с отроча́, поста́ви е́ посреде́ их, И рече́: ами́нь глаго́лю вам, а́ще не обратите́ся и бу́дете я́ко де́ти, не вни́дете в Ца́рство Небе́сное. И́же бо смири́тся я́ко отроча́ сие́, той есть бо́лий во Ца́рствии Небе́снем.