Евангелие от Иоанна
Евангелие от Иоанна Ин.8:51–59 (зач. 33). Ами́нь, ами́нь глаго́лю вам, а́ще кто сло́во Мое́ соблюде́т, сме́рти не и́мать ви́дети во ве́ки. Ре́ша у́бо Ему́ жи́дове: ны́не разуме́хом, я́ко бе́са и́маши. Авраа́м у́мре и проро́цы, и Ты глаго́леши: а́ще кто сло́во Мое́ соблюде́т, сме́рти не и́мать вкуси́ти во ве́ки. Еда́ Ты бо́лий еси́ отца́ на́шего Авраа́ма, и́же у́мре? И проро́цы умро́ша, кого́ Ся Сам Ты твори́ши? Отвеща́ Иису́с: а́ще Аз сла́влюся Сам, сла́ва Моя́ ничесо́же есть, есть Оте́ц Мой сла́вяй Мя, Его́же вы глаго́лете, я́ко Бог наш есть. И не позна́сте Его́, Аз же вем Его́, и а́ще реку́, я́ко не вем Его́, бу́ду подо́бен вам ложъ, но вем Его́ и сло́во Его́ соблюда́ю. Авраа́м оте́ц ваш рад бы был, дабы́ ви́дел день Мой, и ви́де и возра́довася. Ре́ша у́бо иуде́е к Нему́: пяти́десять лет не у́ и́маши, и Авраа́ма ли еси́ ви́дел? Рече́ же им Иису́с: ами́нь, ами́нь глаго́лю вам, пре́жде да́же Авраа́м не бысть, Аз есмь. Взя́ша у́бо ка́мение, да ве́ргут Нань, Иису́с же скры́ся и изы́де из це́ркве, проше́д посреде́ их, и мимохожда́ше та́ко.