ОРОССОЛУОДА НЭҺИЛИЭГЭР УЛУУСТААҔЫ ОЛОҤХО ЫҺЫАҔА ТЭРИЛИННЭ — 14 июня 2026 г. в 23:12:12.754
ОРОССОЛУОДА НЭҺИЛИЭГЭР УЛУУСТААҔЫ ОЛОҤХО ЫҺЫАҔА ТЭРИЛИННЭ Бэс ыйын 13-14 күннэригэр, Ороссолуода нэһилиэгэр, XIV-с төгүлүн ыытыллар улуустааҕы Олоҥхо ыһыаҕын үтүө түһүлгэтэ тэрилиннэ. Быйылгы ыһыах "Ороссолуода нэһилиэгэ Олоҥхо Ыһыаҕын уруйдуур!" дойдубутугар Норуоттар Сомоҕолоһууларын, Мэҥэ Хаҥалас улууһугар Олохтоох оҥорон таһаарыы сылларыгар уонна уһулуччулаах олоҥхоһут Гаврил Николаевич Ларионов - Халлаан Хабырыыс төрөөбүтэ 135 сылыгар ананна. Ыһыах сүрүн тэрээһининэн, олоҥхонон дьүһүйүү буолла. Г.Г. Колесов аатынан Олоҥхо дьиэтин үлэһиттэрэ, «Кыталык» үҥкүү норуодунай ансаамбыла, улуус бастыҥ олоҥхоһуттара, оһуохайдьыттара уонна Ороссолуода нэһилиэгин үлэһит дьоно, кэнчээри ыччата кыттыылаах туруорууларын бар дьон сэргээн, астынан көрдө. Үөрүүлээх күн улуус баһылыга Дмитрий Тихонов, ытык-мааны ыҥырыылаах ыалдьыттар Олоҥхо ыһыаҕын үтүө түһүлгэтэ тэриллибитинэн итии-истиҥ эҕэрдэлэрин тиэртилэр. Түһүлгэҕэ туруу үлэһит дьоммутун чиэстээтилэр, наҕараадалары туттардылар. Икки күннээх ыһыах чэрчитинэн «Оллоонноон олорон олоҥхону толоруох!» күрэх оҕолорго, ыччаттарга уонна улахан дьоҥҥо олоҥхону биирдиилээн уонна бөлөҕүнэн толорууга ыытылынна. Ону таһынан, «Олоҥхо ыһыаҕын оһуор-мандар түһүлгэтэ» быыстапка, оһуокайга күөн күрэс, "Боотур холото" саха төрүт оонньууларыгар аһаҕас күрэх тэрилиннилэр. Олоҥхо – биһиги норуоппут үйэлэри уҥуордаан илдьэ кэлбит, көлүөнэттэн көлүөнэҕэ бэриллэр сүдү баайа, мындыр өйө, духуобунай күүһэ. Олоҥхобут салгыы үүнэ-сайда, үгүс дьон биһирэбилин ыла туруохтун. Хаартыскалары бу сигэҕэ көрүҥ: https://drive.google.com/drive/folders/1sa983HJYZooTddyeua5pRajSRYrv7kJp?usp=sharing Мэҥэ Хаҥалас улууһун дьаһалтатын пресс-сулууспата