(Интернет челтәреннән күңелгә үтеп кергән бер притча таптым әле) — 26 сентября 2026 г. в 05:49:56.054
(Интернет челтәреннән күңелгә үтеп кергән бер притча таптым әле) Бервакыт бер кеше чәчен һәм сакалын тәртипкә китерү өчен чәчтарашка (парикмахерга) барган. Алар чәч кискән вакытта төрле нәрсәләр турында сөйләшеп утырганнар. Кинәт сүз Аллаһ турында чыккан. Чәчтараш болай дигән: — Мин Аллаһның барлыгына ышанмыйм. — Нигә алай дисез? — дип сораган клиент. — Сез урамга гына чыгып карагыз, — дигән чәчтараш. — Әгәр Аллаһ бар булса, дөньяда шулкадәр авыру кешеләр, ятим балалар булыр идеме? Әгәр ул бар булса, кешеләргә кайгы-хәсрәт, авырту калдырмас иде. Барлык кешеләрне дә бәхетле итәр иде. Мин мондый шәфкатьсез дөньяны күргәч, Аллаһның барлыгына ышана алмыйм. Клиент бераз уйланып торган, ләкин бәхәсләшмәскә карар итеп, дәшмәгән. Чәчтараш эшен тәмамлагач, клиент аңа рәхмәт әйтеп, урамга чыккан. Урамга чыгу белән, ул чәчләре-сакаллары үсеп киткән, үзен карамаган, пычрак бер кешене күреп алган. Клиент шунда ук чәчтарашханәгә кире әйләнеп кергән дә чәчтарашка болай дигән: — Беләсезме нәрсә, дөньяда чәчтарашлар юк! — Ничек юк? — дип гаҗәпләнгән чәчтараш. — Мин менә монда, һәм мин чәчтараш! — Юк! — дигән клиент. — Алар юк. Әгәр чәчтарашлар булса, урамда чәч-сакаллары үскән, каралмаган кешеләр булмас иде. — Нәрсә сөйлисез сез, — дип көлеп җибәргән чәчтараш. — Чәчтарашлар бар ул. Бу кешеләр үзләре генә минем янга килмиләр. — Менә! — дип җавап биргән клиент. — Сүз дә шунда бит! Аллаһ та бар. Бары тик кешеләр үзләре ГЕНӘ Аңа таба бармыйлар һәм Аны эзләмиләр. Менә шуңа күрә дөньяда шулкадәр күп кайгы һәм авыртулар бар.