⚡«Тыва Республиканың хүндүлуг донору» күрүне шаңналын тургускан — 15 июня 2026 г. в 06:28:34.223
⚡«Тыва Республиканың хүндүлуг донору» күрүне шаңналын тургускан ✍Тывада база бир – «Тыва Республиканың хүндүлуг донору» күрүне шаңналын тургускан. Дээди Хуралдың күскү сессиязында шаңналдар дугайында регионалдыг хоойлузунче чогуур немелдени киирер дугайында хоойлу төлевилелин сайгарып көрген. ТР-ниң кадык камгалал сайыды Анатолий Югай донорларга хүндүлүг атты доктаадырының дугайында саналды Федерация Чөвүлелинде Тываны төлээлеп турар сенатор Людмила Нарусовадан кииргенин дыңнаткан. Чаа шаңналдыг сорулгазы – ханын бодунуң күзели-биле дужаап турар хамаатыларның ачы-хавыяазын хөй мурнунга демдеглээри, ол ышкаш донорларның социал байдалын бедидери болгаш чон аразынга ону нептередири. Ол хоойлу төлевилели езугаар «Хүндүлүг донор» атты эвээш дизе 30 катап арыг хан дужааган хамаатыларга тыпсыр. Оон аңгыда арыг ханны эвээш дизе 20 катап, ол ышкаш ханның плазма кезээн 30 азы оон хөй катап дужааган донорларга база тыпсыры көрдүнген. Азы чүгле плазманы 50 азы оон хөй катап донорлаан болза, ол атты тыпсыр. Бо үеге чедир Тывада эң-не идепкейлиг донорларны «Россияның хүндүлүг донору» деп федералдыг ат-биле демдеглеп турган. Бо хүнде республикада ол аттың 499 эдилекчизи бар. Ол хүндүлүг атты алырының негелделери улуг: 40 азы оон хөй катап арыг ханны база 60-дан хөй катап плазманы дужаар ужурлуг. «Хан кудары негеттинип турар аарыг кижилерге үнелеп четпес деткимчени көргүзүп чоруурун барымдаалап, база хан банкызын деткип, үлүг-хуузун киирип чоруур донорларны демдеглээр деп шиитпирледивис» – деп, Анатолий Югай тайылбырлаан. Федералдыг аттың эдилекчилери чылдың-на акша төлевирин (2025 чылда 18747,77 рубль) ап болза, Тывада хүндүлүг донорлар кандыг-даа төлевирлер көдүнмээни-биле ылгалдыг. Республиканың хүндүлүг донорларынга хөрек демдээ биле шынзыдылганы тыпсыр.