⚡Чайлаг-Шөлде малчыннарга байырлал — 13 июля 2026 г. в 10:00:25.969
⚡Чайлаг-Шөлде малчыннарга байырлал ✍Үстүү-Ишкинниң Чайлаг-Шөлге чаңчыл болган «Чайлаг байырлалы» болуп эрткенин Сүт-Хөл кожууннуң чагыргазы дыңнаткан. Бо чылгы тыва чоннуң онзагай байырлалын РСФСР-ниң национал хевирлеринге спорт мастери, чонунуң аразында «Тыва хүрештиң профессору» деп хүндүлүг аттыг, Чөөн- Хемчик кожууннуң Арзылаң мөгези, Сүт-Хөл кожууннуң Начын могези чораан Николай Ондарның чырык адынга тураскааткан. Алага Ондарның өг-бүлези болгаш дөргүл-төрелдери байырлалды бедик деңнелге эрттирген. Олар хемчег мурнунда кожуун чагыргазы-биле сүмелешкеш, демнежип тургаш ырак-узак черде чурттап чоруур малчыннарга улуг деткимчени көргүзүп, боттарының машина-техниказы-биле кадыр, берге, малгаштыг оруктарның байдалын экижидип, септээн. Улуг мөге чораан Н. К. Ондарның чырык адынга тураскааткан үш аңгы салыгга аът чарыжын болгаш республика чергелиг хүреш маргылдаазын малчыннар болгаш аалчылар сонуургап көрген. Ишкин чурттуг аныяк ыраажы Күзел Сат база кожууннуң аныяк артистери чыылганнарга хөгжүмнүг байырны чедирген. Полиция ажылдакчылары корум-чурумну хандырган, төп эмнелгениң эмчилери малчыннарның кадыкшылының байдалын шинчилээн. Кожуун чагыргазы ырак-узак чайлагларда малын малдап чоруур эрес-шудургу малчыннарның сеткилин өөртүп, чараш байырлалды эрттиргени база оларның хүн бүрүде аргыжар оруунуң байдалын экижидип, септелге ажылдарын чоргусканы дээш, төрел аймакка өөрүп четтиргенин илереткен. Эрткен чылын «Чайлаг байырлалын» Ишкин чурттуг алдар аттыг артистер улуг хемчээлдиг кылдыр эгелеп эрттиргеш, байырлал шөлүн белеткеп кылган.