⚡"Шара-Нуур" хоочуннар лагериниң бирги ээлчээ доозулган — 28 июля 2026 г. в 10:35:32.821
⚡"Шара-Нуур" хоочуннар лагериниң бирги ээлчээ доозулган ✍Ак-Эрик сумузунуң Аяс Данзырын аттыг культура бажыңы "Шара-Нуур" хоочуннар лагериниң бирги ээлчээн байырлыг байдалга хаагганын дыңнаткан. Культура одааның ажылдакчылары болгаш хоочуннар "Шара-Нуурум алгап тур мен" деп концертти бараалгаткан. Дыштанып келгеннерниң тергиннерин шаңнап-мактаан. Культура бажыңының ажылдакчылары хоочуннарны чаңгы-даа хүн чалгааратпас дээш, солун программаны кылган: эртенги сула шимчээшкиннер, "хөглүг стартар", даалы болгаш шыдыраа маргылдаалары, кожамыктар, солун чугаалар, ужуралдар кежээлери... Хоочуннар эмниг-домнуг Шара-Нуур хөлге малгаштанып, эштиринден аңгыда, Нарын хемге чедир селгүүстеп база чораан. Тус черниң суму чагыргазының даргазы Аяс-оол Сакпая лагерьге аалдап келгеш, дыштаныкчыларга байыр чедирип, кадыкшылды күзээн. Хоочуннарның аразында оглу биле уруу тускай шериг операциязында киржип турар эне база бар. Чагырга даргазы Галина Соянга «Тускай шериг операциязының киржикчизиниң авазынга» деп медальдарны тывыскан. Хоочуннарга Тываның Улустуң чогаалчызы Кара-Күске Чоодунуң 90 харлаанынга тураскааткан чурук көрүлдезин, номнарының делгелгезин база сонуургаткан. Олар өгбениң шүлүктерин чугаалап турган. Дыштаныкчылар аңгы-аңгы хемчеглерге идепкейлиг киржип, солун үени эрттирип, мага хандыр дыштанган. "Эрткен үем ырылары" деп ыры мөөрейинге олар утка-шынар сиңген ырыларны уярадыр бадырып турган. Сумунуң ус-шеверлери ажылдарының делгелгени база кылган. Лагерьниң ажыдып база хаап турда дыштаныкчыларны «изиг-ханнаткан». Хоочуннарны хүнде беш катап чемгерип турган. Лагерьниң дүрүмү езугаар олар эртенги үеде ыяап-ла амданныг "чудаң шайны" ижер. 2008 чылда Кызыл-Чыраа сумунуң чагырыкчызының эгелекчи саналы-биле хоочуннарга лагерьни ажыткан. Аңаа республиканың аңгы-аңгы булуңнарындан улуг назылыглар дыштанып, кадыкшылын быжыктырып ап турар.