⚡Келир үениң тудугжуларының эге базымы — 1 сентября 2026 г. в 10:49:35.183
⚡Келир үениң тудугжуларының эге базымы ✍Тываның тудуг техникумунга чаа өөредилге чылынга болгаш Билиглер хүнүнге тураскааткан байырлыг чыскаалга Тыва Республиканың Өөредилге яамызының методизи Линда Биче-оол, директорнуң хүлээлгезин түр када күүседип турар Аржаана Мөнделе, директорнуң оралакчылары Ляна Тарый болгаш Елена Разумова бирги курсчуларга байыр чедирген. Бо чылын 315 оолдар, кыстар Тываның тудуг техникумунче документилерин дужаагаш, чогуур негелделерни, ооң иштинде шылгалдаларны эрткеш, студент болур аас-кежиктиг болганнар. Оларның аразында амгы үеде хүндүлүг дыштанылгада пенсионер Оюмаа Байыр-оолдуң уйнуу Байыр-оол Санге база бар. Кырган-ачазын Алексей Байыр-оолду база ачазын дөзээн шевер, чазаныр салымныг болган оглун кырган-авазындан аңгыда, авазы Шораана база кады төрээн кыс дуңмазы ортумак профессионал өөредилге черинче үдеп чедип келген. Тываның тудуг техникумунга болган байырлыг чыскаал доозулган соонда, «Оран-сава тудар база ону ажыглалга киирери», «Каңнакчы», «Архитектура» деп мергежилдерге бирги курсчуларны өөредип эгелээр куратор башкылары Ирина Гаджиева, Чодураа Сат, Оюмаа Сат, Валентина Шубина, Буян-кыс Донгак болгаш өске-даа башкылар аудитория, класстарже эдертип алгаш чорупкан. Аңаа чаа өөредилге чылы, сентябрь 1 - Билиглер хүнүнден аңгыда, өөредилге программазын, кичээлдерниң расписаниезин, Тываның тудуг техникумунуң оран-савазын, өөредилге мастерскаяларының дугайында таныштырылганы чоруткан. Тываның тудуг техникуму Тывада узун төөгүлүг болгаш чылдың-на янзы-бүрү мергежилдиг специалистерни өөреткеш, доостуруп үндүрүп чоруур ортумак профессионал өөредилге чери болур. Тываның тудуг техникумунуң эрткен төөгүзү. 1964 чылда Тыва Автономнуг Совет Социалистиг Республиканың эгелээшкини-биле Красноярскиниң 35 дугаар Профессионал-техниктиг өөредилге чериниң салбырын Кызылга ажыткан. 1972 чылда ПТУ-35-ти, үш чыл өөренир ПТУ-4 кылдыр эде тургускан. Тыва Автономнуг Совет Социалистиг Республиканың профессионал өөредилге талазы-биле начальнигиниң чарлыы ёзугаар, ПТУ-4 – Профессионал-техниктиг училище СПТУ-4 – Көдээ ажыл-агый техникуму кылдыр 1974 чылдан эгелээш 1994 чылга чедир ажылдаан. 1994 чылдан эгелээш 2011 чылга чедир ПУ-4 - Профессионал училище кылдыр эде тургустунган. 2011 чылда училищени Тываның тудуг техникуму кылдыр эде адаан. 2013 чылдың октябрь 25-те Тыва Республиканың Чазааның Доктаалы-биле Профессионал өөредилгениң Күрүнениң бюджеттиг күрүне албан чери «Тываның тудуг техникуму» бүрүн эргелиг ажылдап эгелээн. Мерген Ондар. Авторнуң тырттырган чуруу.