Күндү выпускниктар, учууталлар уонна төрөппүттэр! — 25 мая 2026 г. в 10:57:04.275
Күндү выпускниктар, учууталлар уонна төрөппүттэр! Эһигини Сунтаар улууһун үөрэҕириитин салалтатын аатыттан Тиһэх чуораан бырааһынньыгынан итиитик-истинник эҕэрдэлиибин! Тиһэх чуораан бырааһынньыга –хас биирдии оскуоланы бүтэрэр выпускникка олох киэҥ аартыгар үктэнэр кэрэ-бэлиэ түгэнэ буолар. Быйыл Сунтаар улууһа төрүттэммитэ 225 сыллаах үбүлүөйүгэр оскуоланы-290, 9 кылааһы-393 выпускниктар бүтэрэллэр. Күндү выпускниктар! 11 сыл анараа өттүгэр бастакы чуораан тыаһынан оскуола боруогун аан бастаан атыллаан киирэҥҥит, Билии аартыгар бастакы учууталгыт сирдьит буолан ааҕарга-суруйарга, суоттуурга үөрэппитэ. Бүгүҥҥү тиһэх чуораан эһиги оҕо сааскытын уонна инники олоххутун ситимниир улахан бэлиэ суолталаах. Тиһэх чуораан хас биирдиигитигэр оҕо саас оскуолатааҕы кэмэ күндү өйдөбүл буоларын санатан, лыҥкынас чуораанынан чугдаарыа. Бастакы чуораан үөрэх-билии аартыгын арыйбыта, онтон тиһэх чуораан эһигини олох киэҥ аартыгар ыҥырар. Хас биирдиигит иннигитигэр үөрэҕи салгыыр, идэни баһылыыр, олоххо бэйэ миэстэтин булунар сүрүн сорук турар. Эксээмэннэргитин ситиһиилээхтик туттараҥҥыт сөбүлүүр идэҕитин талаҥҥыт, киэҥ билиилээх үлэни өрө тутар үөрэхтээх, үтүө үлэһит дьон буолуоххут диэн эрэнэбин. Баҕарбыт баҕа санааларгыт туоллуннар, былааннаабыккыт барыта олоххо киирдин, инникигит диэки эрэллээхтик хардыылаан, саҥаттан саҥа үрдэллэргэ дабайыҥ! Күндү учууталлар! Эһиги, түстээбит кэскилгит кэнчээрилээх буоларын туһугар бэриниилээх, таһаарыылаах үлэҕит, улууспут үүнэр көлүөнэ ыччатыгар иҥэрбит сүрэххит сылааһын, дириҥ билиигит, сатабылгыт иһин истиҥ махтал тылларын тиэрдэбин. Ытыктабыллаах төрөппүттэр! Күн сирин көрдөрөн, кыраларыттан бүөбэйдээн-иитэн улаатыннарбыт тапталлаах оҕолоргут дьиэ-кэргэнтэн уонна билии биһигиттэн-оскуолаттан куорсун анньынан олох киэҥ аартыгар үктэннилэр. Оҕолоргутугар сырдык, ыраас санааҕытынан, истиҥ-иһирэх сыһыаҥҥытынан бигэ тирэх буолан араҥаччылыы-арчылыы туруҥ. Сунтаар улууһун үөрэҕириитин салалтатын салайааччыта Б.Н.Васильев