🔹 Тываның Баштыңы Владислав Ховалыг республиканың барыын кожууннарынче ажыл-агыйжы үнү... — 7 сентября 2026 г. в 09:41:44.483
🔹 Тываның Баштыңы Владислав Ховалыг республиканың барыын кожууннарынче ажыл-агыйжы үнүүшкүн үезинде, Чөөн-Хемчик кожуунга база четкен. Ол чорааш, орук инфраструктуразының, спортчу объект тудуунуң, школаның чылыдылга системазының септелгезин, Үстүү-Хүрээ девискээриниң чаагайжыдылгазы кайы хире чоруп турарын хынап көрген. Шеми суурче кирер орукту база хынаан. ниити узуну 15 километр орук участогунуң дөрт километринде ажылдар доозулган. Республика Баштыңы ажылдарның шынарын мактап, регионалдыг орук фондузунуң арга-шинээн барымдаалап, моон соңгаар акшаландырыышкын айтырыын сайгарып көөрүн дааскан. Шемижилер-биле ужуражылга үезинде суурнуң төп кудумчузун асфальтылаар айтырыг база көдүрген. «Шеминиң чурттакчылары төп кудумчуну асфальтылап бээрин дилээннер. Бир эвес чылда 2,5-3 километрни кылып чоруп олурар болза, суурнуң кудумчулары беш хире чыл иштинде чаартына бээр. Чурттакчы чон ындыг аргага чөпшээрешкен» - деп, Владислав Ховалыг дыңнаткан. Ангар хевирлиг спорт залының тудуу адакталып келген. Объекти 95 хуу белен. Тус черниң чурттакчылары ажылдарда хаара туттунган. Бо чоокку үеде спорт залды ажыдары планнаттынган. Республика Баштыңы Бажын-Алаак суурда школаның одалга системазын солуур ажылдарны хынап четкен. Суурнуң чурттакчылары эрткен өөредилге чылында школаның өрээлдери соок деп хомудалды киирген соонда, капитал септелгени кылыр дугайында шиитпир хүлээп алдынган. Амгы үеде кол ажылдар доозулган, котельнаяның дериг-херекселдерин эптеп салып турар. «Кол ажылдар шупту доозулганын көрдүм. Ам котёл салыры дооступ турар болду. Сентябрь 10-да шенеп одаар болганнар. Ооң соонда түңнелин меңээ дыңнадыптарлар» - деп, Владислав Ховалыг дыңнаткан. Ол чорааш, Үстүү-Хүрээ хүрээ комплекизиниң чаагайжыдылгазынче онза кичээнгейни угландырган. Объектиде брусчатканы чадыпкан, ооң девискээрин чаагайжыдар ажылдар ам-даа уламчылап турар. IV-кү делегей чергелиг буддийжи форумга белеткел үезинде комплексти чаагайжыдып эгелээн. Владислав Ховалыг ажылчын үнүүшкүн үезинде, Ак-Довурактың, Барыын-Хемчик кожууннуң Аксы-Барлык суурнуң, Чөөн-Хемчик кожууннуң Бажың-Алаак суурнуң чурттакчылары-биле база ужурашкан. Чурттакчы чон оруктарны септеп-ажаарының, хөй-ниити шөлдерин чаагайжыдарының, көдээ ажыл-агый болгаш социал инфраструктураны хөгжүдериниң дугайында айтырыгларны көдүрген. «Чүгле дорт чугаалажып тургаш, чер черлерде боттуг байдалды билип ап болур. Төрээн чери дээш сеткилинден сагыш човап чоруур кижилерниң хөйү, өөрүнчүг-дүр» — деп, Тываның Баштыңы демдеглээн.