ХЕЙ-АЪТ КЫЙГЫЗЫ — 10 июня 2026 г. в 05:30:18.336
ХЕЙ-АЪТ КЫЙГЫЗЫ Ѳгбелерниң ѳндүр чаагай маадырлыг тоолдарының кезектери… Тыва хүреш дугайында тоол Шыяан ам! Эки шагның эктинде Бак шагның бажында-даа чүвең иргин! Шуткуп каан чүве-биле дөмей сүр-күштүг, Кедергей күчүлүг шыңганарлыг, Үрдүрүп каан сыңыйлар дег, Ийи дартагар, кончуу сүргей дөңмектерлиг, Дырбактыг дег аваангыр, Хартыга дег кашпагай, Дүндүгүр-ле кадыр хавактыг, Шырайынче удур көрген улус сүрээдеп турар түрлүг. Дыргактыг чүве дыңнып-даа болбаан, Эгинниг чүве эннежип-даа болбаан, Тозан буга кежи содактыг. Кыш болурга, Кыштың хыраазындан, Чай болурга, Чайның шалыңындан-даа Танып туруп турлар. Шѳл черге баарга, Даг апаар, Даг черге кээрге, Ажык шѳл болу бээр, Оргу чаагай Оранга кээрге, Дѳң-дѳстек кылдыр Тепсеп-даа туруп турлар эвеспе. Тевектептер дээрге, Дээрниң делгеми-биле, Дээлдигенниң дезии-биле Алдырбас, Кажыктаптар дээрге, Каптагайның делгеми-биле, Хартыганың кашпагайы-биле Алдырбайн-даа турган иргин. Ужуражып келгештерниң, Бугалар бооп Хыйыртажы берген Туруп турлар, Бууралар бооп Дизээлежи берген-даа Туруп турлар оо! Шыяан ам!!! Кадыг черни кажыкка киир, Дѳң черни довукка чедир, Кара күштү базар хүреш оюну Эгелээн-даа чүвең иргин! Сѳзүглелдиң тургузукчузу: Алена Хорбаа Аялгазы: Андрей Монгуш Үн бижидикчизи: Шораан Салчак Күүселдези: Арсен Ондар Чурук каасталгазы: Айлаң Пириней Хүндүлүг чонувус! Үш ыдык оюннарывыстың байырлыг чыскаалдарынга ук материалды салып ап турарын сүмеледивис!