🖋 Өвүр чүден эгелээнил? — Меңги Доваторовна Бузураш (Доржу)
🖋 Өвүр чүден эгелээнил? — Меңги Доваторовна Бузураш (Доржу) Өгбелерниң төөгүзүнден, Өндүр ыдык сагылдардан, Улуг Моолдуң кызыгаары, Убса-Хөлден, Буланныгдан, Өөр-өнер төрел чондан, Өткүт ырдан, хөөмейден. Өвүр чүден эгелээнил? Кадыр арттар, сыннарындан, Хандагайты, Солчурумдан, Хайым-ишчи чонумайдан, «Хайыраан бот» Кара-Туруг, Арат-чоннуң айызаныр, Ады алгаан аржааннардан. Өвүр чүден эгелээнил? Торгалыгдан, Чаа-Суурдан, Тоолчургу чугаалардан, Ыдык Дус-Даг, Тээлиден, Ыры-хөгжүм, аялгадан. Чараш самныг кыстарындан, Чаштарывыс өпейлерден. Өвүр чүден эгелээнил? Амдайгындан, Сарыг-Хөлден, Ак-Чырааның шөлдеринден, Арбын-көвей сиген кескен, Аалчылар, кожалардан, Аккыр сүрүү дешкилешкен, Анай туткан малчыннардан. Өвүр чүден эгелээнил? Сагыш ышкаш Саглылардан, Сарлык доскан кадарчыдан, Самнап девээн мөгелерден, Саанчыдан, ыраажыдан, Эртемденнер, чогаалчылар, Эргим байлак тайгалардан. Шүлүктүң дөзү: Газета "Твой Информ" - "Тыва чогаалдыӊ өргээзи" Чуруктуң дөзү: Өвүр кожууннуң Шаалааш хемниң шарлаажы, фоточурукчу Ада (Алдынмаа) Тюлюш Тыва ырылар | @channel_tuvamusic