⚡Шииттирген кижи бүрүзүн ажылчын мергежилдерге өөредип турар
⚡Шииттирген кижи бүрүзүн ажылчын мергежилдерге өөредип турар ✍Тываның Баштыңы Владислав Ховалыг Кызыл хоорайның бир дугаар эдип-чазаар колонияның коллективи-биле ужуражып, Россияның кеземче күүселдезиниң Тывада эргелелиниң начальниги Руслан Петеневка «Лада Гранта» маркалыг автомашинаның дүлгүүрүн тывыскан. Ол ышкаш Кызылдың бир дугаар эдип-чазаар колониязында дааранылга цегинге 10 даараныр машинаны, бус генераторун дамчыткан. Руслан Петенев Тываның Чазаа регионнуң кеземче-күүселде системазының албан черлеринге чаңгыс эвес удаа деткимчени көргүзүп турарын онзалап демдеглээн. Россияның кеземче күүселдезиниң Тывада эргелели шииттирген кижилерни ниитилел амыдыралынга чаңчыктырар база социал ижигиишкин талазы-биле улуг ажылды чорудуп турар. ТР-ниң Чазак Даргазының оралакчызы Эдуард Сандан Кызылдың бир дугаар эдип-чазаар колонияның бүдүрүлге секторунга четкен. Ол хоругдал черинде автотранспорт хереглелин хандырар болгаш септээр, даараныр, эт-сеп чазаар, ыяш болбаазырадыр, демир-дес аймаандан ус-дарган ажылдар, демир-бетон кылыгларының, дүк болбаазырадыр цехтериниң ажылы-биле танышкан. Ында кеземче херээн эрттирип турар шииттирген улус ажылдап турар. Хоругдал чери шииттирген кижи бүрүзүн хосталгаже үндүрерде, бир-ле мергежилге өөреткен турар ужурлуг. Оон аңгыда, дээди эртем чедип алыр күзелдиглерге орук база ажык. Бир дугаар эдип-чазаар колонияда профессионал училищеде шииттиргеннерни ажылчын мергежилдерге (каңнакчы, дашчы, бызаңчы, одакчы, машина септекчизи, даараныкчы, автомобиль септээр узаныкчы дээш оон-даа өске) өөредип турар. Өөредилге албан черинде чугула херек өөредилге-методиктиг баазаны тугузускан, бүдүрүлге мастерскалары, дериг-херексел, өөредилге-көргүзүглүг ном-дептер-биле чепсеглээн. Дааранынга цегинде шииттиргеннер боттарынга болгаш кеземче-күүселде системазының ажылдакчыларынга хепти даарап турар. Тываның Чазаа болгаш тус чер бот-башкарылга органнары-биле кады ажылдажылганың ачызында чагыглар хөй. Делегей чергелиг сарыг шажын шуулганынга 400 хире мобильдиг херимни кылган. Ол ышкаш бок төгер контейнерлер, тудуг материалдары... 2024 чылда Тываның Чазаа дүк болбаазырадыр цехке дериг-херекселди дамчытканын сагындыраал. Бүдүрүлге чедиишкинниг ажылдап, дүктү болбаазырадып турар.