🏔️ САТА ХАЙАТЫГАР АЙАН — 8 августа 2026 г. в 08:00:03.662
🏔️ САТА ХАЙАТЫГАР АЙАН Билигин үгүспүт даҕаны араас санааҕа ыллара, араас стресска сылдьара кистэл буолбатах. Инньэ-кэннэ биллибэт кэмҥэ киһини сааһылыыр, уоскутар айылҕа эрэ баар. Онон сиэттэрэн, аҕабын Осипов Михаил Михайловиһы кытта, кини төрөөбүт дойдутугар Ньурбаҕа бара сырыттыбыт. Сыалбыт-сорукпут Ытык сир Сата хайатын көрүү, күүс-сэниэ ыла барыы этэ. Оскуолаҕа 9-с кылааска үөрэнэ сылдьан, учууталбыт Егор Васильевич, сатыы 10-ча оҕону илдьэ бара сылдьыаҕыттан, бу Ытык сири дууһалыын таптаан, хас да сыл ыра санаа гынан, сайын аайы барыахпын баҕарар баҕа санаабын, аҕам толордо 🥰♥️ «Дочам Сата хайатыгар барыан баҕарар диэн" массыынабытыгар олороот, аймахтарбытыгар Маарга, Самсоновтарга тиийэн, икки моторканан айаннаан кинилэр үүтээннэригэр хонон сынньанан турдубут. Убайбыт Григорий уонна саҥаспыт Варвара, отой ойуур дьоно эбит, аҕабын этэ да барбаппын (бэйэтэ Мэхээлэчээн булчут) айылҕа араас дьиктитин барытын көрдөрөн-кэпсээн.🥰😍 Хатыҥ тэллэйиттэн кумаар эмэ, өрүс тааһыттан быһах сытыылыыр, шашлык буһарарга талахтан шампур оҥорон, аны араас кыыл-сүөл суолун, эмптээх от-мас туһунан сиһилии кэпсээн биэрдилэр. Мин бэйэм, оҕолорум өссө элбэх билии ыллыбыт. Куорат оҕолоро, айылҕа үөрэҕин аастылар. Кэлэ-бара үүтээҥҥэ диэри 6 көс отой хаппырыыстаабакка, барытын көрө-истэ, суолларын билбэккэ хааллылар. Үүтээҥҥэ тото-хана аһаан-сиэн баран, аҕам өттүнэн аймахтарым туһунан ыйыталаһан элбэҕи биллим. Инникитин аҕам өттүнэн төрүччүбүн үчүгэйдик үөрэтиэхпин баҕардым. Иккис дойдум Ньурба туһунан, өбүгэлэрбин билиэхпин баҕардым. Ааттарын-суолларын ыйыталаһан бэйэбэр суруннум. Утуйан туран баран, дьэ сыаллаан баран иһэр сирбитигэр Сата хайатыгар бардыбыт. Оо, кэрэтиин даҕаны. Сахабыт сирин биир дьикти, күүстээх энергетикалаах, ЫТЫК СИРЭ - САТА ХАЙАТА.😍⛰️ Тиийээппитин кытары күн хайа үрдүгэр тахсан, ураты күүс-сэниэ бэристэ.😍 Сирбитин аһатан баран, аны балыктыырга санаммыппыт, оо Бүлүү эбэбит барахсан күндүлэтээтэ. Оҕолорум уонна мин бэйэм даҕаны бастакыбытын сордоҥ хаптаран үөрүүбүт муҥура суох буолла. Ити курдук, чуумпуран, тохтоон, иһийэн өрө тыынан айылҕабытыгар чугаһаан ураты күүс-сэниэ ылан төттөрү дойдубутугар кэллибит. Дууһалыын чэпчээбит курдук сананныбыт. Оҕолорум сарсыарда 11:00 нэһиилэ турар бэйэлэрэ, улахан уолум, сарсыарда 7 туран эһээтигэр көмөлөһө сылдьара бу бэйэтэ ураты үөрэх, дьол. 🥰♥️ 🍀 АЙЫЛҔА БААР ДЬИҤНЭЭХ УЧУУТАЛ. ✍️ Зинаида Григорьева @ulusmedia