⭐️ Үтүө санаа уҕараабат
⭐️ Үтүө санаа уҕараабат 🚤 Ааспыт сыл от ыйын 26 күнүттэн “Аллараа Бэстээх – Дьокуускай куорат” хайысхатынан Сергей Владимиров салайааччылаах “Сулус” тэрилтэ 5 саҥа катердара сарсыарда 8 чаастан киэһээ 20 чааска диэри күннэтэ дьону таһар үлэлэрин саҕалаабыттара. Быйыл иккис сезоннарын эбии биэс саҥа катеры атыылаһан, уон катерынан дьону тастылар. Аллараа Бэстээххэ сыыр анныттан Дьокуускайга өрүс пуордугар диэри айан сыаната биэс мөһөөхтөн уларыйбата. 🙌🏼 Урбаан эйгэтигэр сиэрдээх күрэстэһии баар буоллаҕына сөптөөх сыана олохтонор. Дьоммут-сэргэбит кэскиллээх хамсааһыны саҕалаабыт уолаттарга махтанан, өйдөөн, көмө-тирэх, өйөбүл буола тураллар. 🪚 Айанньыттарга табыгастаах буоларын туһугар норуот күүһүнэн ааспыт сылга ардахтан-тыалтан хаххалыыр 6х3-тээх сэндвич панелтан дьиэ тутуллубута, аттыгар ыскамыайкалардаах, чугас чэпчик оҥорбуттара. 🪓 Быйылгы сезон сабыллыан иннинэ, бүгүн, алтынньы 6 күнүгэр биир дойдулаахтара субуотунньук тэрийэн, Аллараа Бэстээххэ сатыы тахсар-түһэр дьоҥҥо анаан икки сиринэн кирилиэс оҥорон туруордулар. Бу дьыаланы көҕүлээччинэн Лоомтука олохтооҕо Павел Неустроев буолар. Кини “Сулустарынан” айанныыра элбэх. Ол сылдьан Аллараа Бэстээххэ быһалыы буор ыллыгынан сатыы тахсар-түһэр дьону көрөн, манна кирилиэс баара үчүгэй буолуо эбит диэн санаатын тиэрдибитэ. Оннук санаалаах дьон элбээммит, субуотунньугунан кыайыахха сөп диэн куйаар ситиминэн манна баҕалаах дьонтон харчы хомуллубута. Үтүө дьыала туһугар мэлдьи инники сылдьар “Түмэн” уопсастыбаннай холбоһук салайааччыта Мария Лукина былааммытын Майа олохтоох дьаһалтатыгар, улуус дьаһалтатыгар тиэрдибитэ. Онон дьон көхтөөхтүк тахсан үлэ-хамнас тэтимнээхтик барда. 🗣 “Сулус” тэрилтэ дириэктэрэ Сергей Владимиров кэлэн уопсастыбанньыктары кытта көрүстэ. Түгэнинэн туһанан, быйылгы үлэтин-хамнаһын сырдатарыгар көрдөстүм: - Быйылгы сезоҥҥа уон катерынан сүүрдүбүт. Биэс катербыт алтынньы 7 күнүгэр быйылгы сезону сабыахтара, салгыы биэс катер кыдьымах киириэр диэри сүүрүөхтэрэ. Халлаан туругуттан көрөн, бу ый 10-13 күннэригэр диэри үлэлиэхпит. 18-20 чыыһылалар диэки түөрт сымнаҕас олбохтоох суудуналарбыт тахсыахтара. Бу эмиэ олох атын тиэхиньикэ, онон сайыҥҥыттан ыла оҥосто, көрүнэ сылдьабыт. Аллараа Бэстээх өттүттэн тимир суол хампаанньатын вокзалыттан айанныахпыт. Анараа өттүн дуогабарын бу күннэргэ быһаарсыахтаахпыт. Уматык боппуруоһа ыараабыт кэмигэр биһиэхэ улууспут дьаһалтата, өрөспүүбүлүкэттэн тырааныспар министиэристибэтэ, “Туймаада нефть”, “Сибойл”, “Саханефтегаз” тэрилтэлэр салалталара көмөлөһөннөр күннэтэ бэнсииммит кэлэ турбута, ол иһин үлэбит тохтообото. Онон бу тэрилтэлэр салайааччыларыгар, исписэлиистэригэр улахан махталбытын тиэрдэбит. Сиһилии ⬅️ @gazetaerkeii @ulusmedia